30
Aug

年老Golden疑有腫瘤或感染急需治療

獨立義工

Golden 係一隻大約10歲嘅唐狗,無絕育,同其他浪浪無異。年輕時喺錦田一帶流浪,過住好天曬落雨淋嘅生活。佢每日只靠喺垃圾堆搵食物維生,好彩嘅話村民會間中餵食。

芳婆婆見到Golden其實相當可憐,於是主動收養佢。Golden喺狗場陪咗婆婆好多年,一直唔親人而且同人類保持距離,有時更加會同其他狗狗打交。

近年年紀大,加上兩三年前開始有義工自發入場幫手改善場內環境,Golden同人接觸多咗,慢慢接受俾人摸下同仲會識問人拎零食,對人類亦漸漸開始信任,願意同人接觸。

好景不常,Golden身體近星期突然出現變化,平日活躍嘅Golden最近已唔太走動,發現原來雙腳出現水腫而且腳都冇乜力,睪丸亦脹大。之前因資金問題,只有憑相片俾醫生作初部評估,懷疑有腫瘤或傷口感染,需要再深入檢查或手術治療,但因為不能負擔醫療開支,所以不能繼續治療,現希望藉此籌集緊急醫療及手術費用,令Golden 可以健康咁與人類相處多幾年。

一個婆婆與39隻狗狗相依為命的故事

婆婆今年65歲,耗盡一生血汗同體力去照顧貓貓狗狗,原因就只得一個,因為十分愛。婆婆話貓貓狗狗生命只有十數年,所以一定要好好珍惜佢哋。幫到佢哋,自己又開心,咁樣先係唔浪費光陰。

婆婆從小就知道自己鍾意貓貓狗狗,由1隻養到6隻,再由6隻慢慢增加到12隻。其他人知道婆婆鍾意,於是不論喺路邊見到可憐狗BB或者受傷嘅貓貓狗狗,就會直接交俾婆婆照顧,甚至有啲無責任心嘅貓狗主人, 想棄養,就乾脆直接將狗狗放喺婆婆屋企門口。最高峰,婆婆要獨力照顧70隻貓貓狗狗。如是者一個狗場就這樣誕生了。

香港人煙稠密,樓價租金每年幾何式增長,可以想像一個普通人要保持一定生活水平巳十分困難,更何況係要做保護動物權益養70隻貓狗。婆婆本身係九龍人,由於狗狗數目增加,遭到大廈住客投訴,由九龍搬到新界市區,再由新界市區搬到元朗郊外。這個荒蕪地方最後就變成貓貓狗狗的落腳地。婆婆話喜歡這裏的一片寧靜,但卻帶來運送物資的困難,因此,狗場地方環境相當簡陋。同時,交通不便亦耽誤到帶年老和有病貓貓狗狗睇醫生的時間。召集義工亦相當之艱難。雖然如此,但婆婆決心堅定,目標明確,但求一直陪伴睇到佢哋每一個畢業,就心足了。婆婆身體已大不如前,最近眼睛已開始退化,關節因為長期過於勞碌,行路需要拐杖扶持。

婆婆的而且確有她的固執,但是她只想堅持做對的事。動物是一個生命, 保護弱勢社群係每一個人的基本責任。我們希望大家可以伸出援手,幫助婆婆繼續維持這個狗場,繼續宣揚愛護動物的信息,幫助有需要嘅動物。

8月31日早上

義工芳婆婆立即啟程再次帶Golden去睇獸醫

8月31日下午

醫生為Golden檢查及檢驗,報告指出腎指數太差,指數爆標,睪丸亦有事。而Golden同日已去彩虹橋。

截至8月31日晚

Bring Me Home於此個案收到合共HKD2000,已轉交七星崗芳婆婆毛孩之家。芳婆婆現年已65歲,耗盡一生血汗同體力去照顧貓貓狗狗,正接受佢照顧嘅毛孩約70隻,婆婆希望場內每隻貓狗畢業前,佢都能盡佢所能照顧好毛孩。

8月30日晚

義工發現平日活躍嘅Golden已唔太走動,雙腳出現水腫而且無力,睪丸亦脹大。醫生曾作初部評估,懷疑有腫瘤或傷口感染,需要再深入檢查或手術治療。

BMH 浪浪助養計劃係咩?

Suppaw Bring Me Home嘅「浪浪助養計劃」,主要關注香港有心獨立義工或小型救援機構,原因係佢哋無論係時間、人手或者資源,好多時都係被忽略同比較少支援。而網站入面嘅Video,係百分百由我哋Bring Me Home嘅義工用心去拍攝同訪問。原因係第一,我哋親身去到個度就會明白情況是否屬實,第二,係更切身感受同明白義工嘅處境同埋佢哋需要咩支援。

有時候我哋會因為環境關係未必可以即時去領養或者暫託動物,但然而,香港有好多好有心嘅人都仍然想去幫浪浪,特別係一啲緊急個案。希望集合大家小小嘅支持,聚沙成塔,成為幫助更多浪浪嘅巨大力量!

Bring Me Home會跟進同埋確保資訊清晰透明​,我哋會一路完善過程,敬請多多包涵同支持!

*捐款港幣$100元或以上即可扣稅。 (Bring Me Home Ltd – 慈善機構牌照 91/18322)