Nov
流浪貓 大媽口腔潰爛痊癒但生活費仍急需協助
錦田七星崗芳婆婆毛孩之家
大媽，大約10歲，以前一直由清潔姐姐喺村口餵食，大媽為逃避流浪狗，每日匿喺垃圾站高處等待清潔姐姐。幾歲大時，曾生過一胎，不過貓B全部不知所蹤。為免不斷有流浪貓，芳婆婆帶左大媽去絕育，但清潔姐姐要求放回原位由她繼續餵食，直至有一日清潔姐姐離開工作崗位，大媽從此無人餵食，所以婆婆帶咗貓貓入場照顧。
大媽好乖，通常義工喺貓房外面，佢都會走出嚟討摸，或清潔時，佢會靜靜坐喺旁邊。不幸地，最近發現大媽有蛀牙，嚴重到下巴有個大傷口，經常流口水，而且越來越瘦，於是馬上就診。發現原來蛀牙已深入牙骨導至發炎, 幸得善心人幫助就診及承擔醫藥費，但往後仍然覆診及多加口腔護理，希望大家亦可幫忙助養貓大媽啦 ！
一個婆婆與39隻毛孩相依為命的故事
婆婆今年65歲，耗盡一生血汗同體力去照顧貓貓狗狗，原因就只得一個，因為十分愛。婆婆話貓貓狗狗生命只有十數年，所以一定要好好珍惜佢哋。幫到佢哋，自己又開心，咁樣先係唔浪費光陰。
婆婆從小就知道自己鍾意貓貓狗狗，由１隻養到６隻，再由６隻慢慢增加到12隻。其他人知道婆婆鍾意，於是不論喺路邊見到可憐狗BB或者受傷嘅貓貓狗狗，就會直接交俾婆婆照顧，甚至有啲無責任心嘅貓狗主人, 想棄養，就乾脆直接將狗狗放喺婆婆屋企門口。最高峰，婆婆要獨力照顧70隻貓貓狗狗。如是者一個狗場就這樣誕生了。
香港人煙稠密，樓價租金每年幾何式增長，可以想像一個普通人要保持一定生活水平已十分困難，更何況係要做保護動物權益養70隻貓狗。婆婆本身係九龍人，由於狗狗數目增加，遭到大廈住客投訴，由九龍搬到新界新市鎮，再由新市鎮搬到更偏遠的元朗郊外。這個荒蕪地方最後就變成貓貓狗狗的落腳地。婆婆話喜歡這裏的一片寧靜，但卻帶來運送物資的困難，因此，狗場地方環境相當簡陋。同時，交通不便會耽誤到帶年老和有病貓貓狗狗睇醫生的時間﹐召集義工亦相當之艱難。雖然如此，但婆婆決心堅定，目標明確，但求一直陪伴睇到佢哋每一個畢業，就心足了。婆婆身體已大不如前，最近眼睛已開始退化，關節因為長期過於勞碌，行路需要拐杖扶持。
婆婆的而且確有她的固執，但是她只想堅持做對的事。動物是一個生命, 保護弱勢社群係每一個人的基本責任。我們希望大家可以伸出援手，幫助婆婆繼續維持這個狗場，繼續宣揚愛護動物的信息，幫助有需要嘅動物。
28 Dec 2022: 經過義工同芳婆婆照顧, 同數次覆診，大媽口腔情況大為改善，而且明顯增磅，進食沒有以前這麼困難，回復以前跳皮既一面，感謝各方提供援助，但日後生活仍希望大家能多多支援。
BMH 浪浪助養計劃係咩？
Suppaw Bring Me Home嘅「浪浪助養計劃」，主要關注香港有心獨立義工或小型救援機構，原因係佢哋無論係時間、人手或者資源，好多時都係被忽略同比較少支援。而網站入面嘅Video，係百分百由我哋Bring Me Home嘅義工用心去拍攝同訪問。原因係第一，我哋親身去到個度就會明白情況是否屬實，第二，係更切身感受同明白義工嘅處境同埋佢哋需要咩支援。
有時候我哋會因為環境關係未必可以即時去領養或者暫託動物，但然而，香港有好多好有心嘅人都仍然想去幫浪浪，特別係一啲緊急個案。希望集合大家小小嘅支持，聚沙成塔，成為幫助更多浪浪嘅巨大力量！
Bring Me Home會跟進同埋確保資訊清晰透明，我哋會一路完善過程，敬請多多包涵同支持！
*捐款港幣$100元或以上即可扣稅。 （Bring Me Home Ltd – 慈善機構牌照 91/18322）
