可唔可以介紹一下毛孩？例如年齡、品種、疾病、性格？
🐶 Megan 係一隻唐狗，大概8個月大，接Megan返屋企果陣佢大概6.5月大。佢係一隻非常貪玩嘅狗狗。初初帶佢出街佢都唔願意返屋企。宜家就成日咬住個波波或者公仔，擔嚟揾人同佢玩。
毛孩係邊度領養？有無背景故事？
Suppaw 網上領養日
點解選擇領養？心路歷程如何？
🐶自己本身都好鍾意狗，但係屋企人就一直就無乜呢個諗法。跟住大概4-5個月前，自己有機會搬出黎自住之後，就決定領養一隻狗仔。自己都有揾過唔少機構申請領養，但係都被拒絕，多數原因都係因爲自己一個人住，中心擔心屋企無人陪到狗狗，對狗狗無咁好。但係自問自己生活都好規律，工作唔會OT，加上同屋企人都住得近，屋企人可以幫手照顧，所以屋企唔會話長時間無人。當初接Megan返屋企嘅時候，其實都好有挫敗感。自己畢竟都係新手。覺得點解Megan 咁耐都未能習慣獨處。因爲Megan 有嚴重分離焦慮症，所以我一出門 Megan 就開始爪門咬門。後尾Mummy 過黎幫手陪Megan, 情況先有好轉。
領養前自己其實都好努力上網睇咗兩個月Youtube 片，例如瞭解下狗性格係點、要花幾多時間陪狗、如何訓練狗仔等等，務求想令自己準備得好少少。直到兩個半月前，有緣係Suppaw 網上領養日就見到Megan出場。果陣發現佢全程都不停用背脊向住鏡頭，烏咀又毛鬙鬙，覺得佢幾得意。加上自己一心想領養中型 size，大概 20kg 内嘅狗，所以就膽粗粗去同義工約見 Megan。前後帶咗屋企人同女朋友去探訪Megan 兩次。覺得自己好鍾意呢隻狗，就決定帶 Megan 返屋企。
Megan 初初返到屋企就識得走去寵物床訓。咁蝦碌嘢例如周圍屙就預咗㗎喇！但係教咗佢幾次之後就無事。唯一最大嘅挑戰就係Megan 會爪門咬門、會吠，開頭係比較緊張。尤其是自己屋企門口係對正 lift 口，所以Megan 會比較敏感。仲記得領養Megan頭3個星期自己都落唔到街。不過自己都預咗領養後至少有一個月時間需要WFH，咁咪當陪下Megan咯！但係係第3個星期就覺得開始響起警號，跟住就聯絡前暫托家庭同埋義工講返個領養進度。義工就分享咗個好有啓發性嘅IG post 俾我，又提供咗好有實質性嘅建議。加上係屋企人幫助之下，自己可以做出門訓練，加長自己出門時間，屋企人係室内教導Megan，避免佢不停爪門或者吠。最近由返半日Office 直到返全日Office，Megan 都好似無再激動地爪門咬門。
雖然話自己被機構拒絕過申請領養，加上之後要面對Megan 嘅分離焦慮症問題，我都無諗過購買同埋棄養Megan。係完全零啊！因爲一心諗住Megan係自己嚟緊十幾年嘅屋企人。
領養毛孩之前 / 之後相比，生活有無明顯改變？
🐶宜家成個生活重點都係Megan。主要都係自己照顧Megan，無論朝早或夜晚都係佢。初期更加日對夜對。自己作爲新手好多嘢要學，就算佢有好輕微皮膚紅，我都擔心餐死，擔心會唔會變得嚴重，甩毛。自己就會學下點樣解決，例如會諗下煮鮮食俾佢。雖然話煮一餐鮮食，但係自己要睇好多教學video 先夠膽咁做。所以都花好多時間去學。領養後生活係開心咗。一早同夜晚可以帶住Megan 落下街，去狗公園，或者周末會趁天氣無咁曬時候帶Megan 去多次狗公園放電，其實生活都幾愉快！Megan 玩完就會好攰，唔會再周圍聞周圍衝，會乖乖地返屋企。
一開始領養Megan 果陣Mummy 都好擔心。又怕狗狗落街後污糟。就算宜家都唔會摸Megan。但係Megan 好乖，又識得聼人嘅指令，所以漸漸地Mummy 其實都被Megan 感化咗。有時 Mummy 都會主動打電話問需唔需要幫手照顧Megan。呢個改變對自己黎講都幾開心。因爲Mummy接受咗Megan，以後Megan又可以多啲陪Mummy。
有啲咩想同「猶疑緊要唔要領養嘅人」講？
🐶 做多啲功課係一定係要㗎喇！諗下自己可唔可以付出到呢啲時間。同埋真係要有啲心力嘅。要有足夠嘅準備功夫。要首先瞭解養狗係咩一回事先。咁但係另一方面就係準備永遠都唔夠嘅，所以如果覺得自己準備得差唔多就可以去行動。我覺得都有好多流浪狗等緊領養。仲有就係耐性好緊要！我自己係新手喇，開頭以爲自己曉好多嘢，識啲嘢，但係到頭來隻狗都係一隻動物，所以係需要花時間溝通，得到佢嘅信任。自己都用咗大概3個星期時間去同Megan 建立關係，跟住第4個星期先開始做階段式訓練。第5-6星期先見到成果。所以要好有耐性！同埋對自己而言，屋企人支持都好重要。因爲如果無屋企人幫手訓練Megan，自己可能日日仲擔心緊Megan 咬道門。
對Suppaw嘅意見同要改善嘅地方
🐶 Suppaw 反應都幾快。我submit 張form 之後好快就有人follow up。同埋義工都好幫到手。領養後頭個半月義工都好關注Megan進度，不斷幫我揾資料幫解決Megan 分離焦慮症，俾自己多返少少信心。Suppaw網上領養日係 work 嘅，尤其是當大家出唔到街，又或者對於有意領養但係又未有咁强嘅執行力嘅人黎講。但係個人認爲如果可以重點介紹幾隻狗仔會比較好，可以令人比較印象深刻。自己到宜家都仲記得當日出場狗狗的名字呀！
