可唔可以介紹一下毛孩？例如年齡、品種、疾病、性格？
Bell 係一隻唐狗，7月頭 1歲啦！領養Bell果時係舊年11月尾。當時領養佢嘅時候見到佢好乖，好安靜，識得行過黎同我哋一齊靜靜地係脚邊。Bell 係安靜到我一度懷疑佢唔識吠。後尾熟絡咗（大概一個月之後）先第一次聽到佢吠。
點解選擇領養？心路歷程如何？
因爲自己有小朋友，所以如果領養嘅話外貌唔係第一條件，性格係第一條件。其實自己都去咗好多唔同機構嘅領養日睇有無喎眼緣嘅狗。但係通常一係有人快過我哋啦，一係就我哋交咗表都無回音。已經去到好多次， 都有少少灰心㗎喇！打算去埋Suppaw同告別流浪天地合作舉辦嘅領養日之後，如果睇埋今次都無，就會抖下先啦！好攰。試想下我交咗表，我等人覆果種感覺都係好煎熬。自己都嘗試去過大型機構領養狗，但係都無回音。因爲一般義工無通知就證明自己唔成功 （但係又無通知自己落選喔！）。事先聲明自己入表申請領養都係唐狗爲主啊！同埋自己想揾隻安靜嘅狗，因爲屋企有一隻唐貓同小朋友。我對上養過兩隻狗；一隻三色哥基，一隻北京狗，養到佢哋終老㗎喇。佢哋走咗幾個月，好 hurt ！兩隻都係老人家，長期病患。我小朋友宜家5歲啦，係佢生命裏面未試過無狗㗎嘛。兩隻狗走咗之後，大人好傷心，小朋友就好挂住啲狗。大人恢復情緒之後就想養返狗。養開狗10幾年，間屋無咗狗嘅脚步聲，原來係一件好 sad 嘅事，屋企會安靜得好心傷。雖然有貓係屋企，但係都有分別。我為咗顧及貓嘅情緒，開頭未有好積極揾成犬，雖然話成犬係比較易啲，但係我要隻狗可以同我貓夾。所以我一路都 target 半歲前後嘅狗，起碼可以睇到佢嘅性格。後尾就遇見 Bell，全家都覺得好合眼緣，好安靜，就帶咗佢返屋企。我哋都預咗BB狗都會調皮，會咬爛曬啲嘢，所以我哋都只係要求佢唔好撲小朋友同埋追貓就算㗎喇！始終佢都仲細。只要唔影響安全為大前提下我哋都無其他太大 concern。曾經義工問點解我要養狗。呢個問題我從來無諗過點解。因爲係我出世開始屋企就有狗，佢係我屋企唔知第幾隻狗喇喎。即係係我屋企入邊，狗係一個 “must”，所以我只係想揾一隻可以成爲我屋企人嘅狗狗。
領養毛孩之前 / 之後相比，生活有無明顯改變？
Bell 係完全顛覆我對唐狗嘅認知。我之前果兩隻狗因爲年紀大，都係陪下，喂藥同埋喂嘢食，唔會精力旺盛，通山跑㗎嘛（雖然話佢哋都後生過）。感覺就好似由凑老人院翻到去幼稚園咁。同埋Bell 高得好快，好快已經可以跳到臺面食嘢，以前啲狗因爲比較矮所以宜家發現好多嘢都要墊高去。Bell 令我重新去學下點樣同年幼兼且長脚嘅狗相處。Bell 宜家雖然重過大隻過小朋友，但係小朋友都當正自己係家姐咁去教Bell。同埋我無諗過唐狗可以肚屙到咁犀利，簡直係玻璃肚。當初一個月我又要拎佢便便去驗，又要帶佢睇醫生，搞完一輪先至正常返唔洗日日屙爛便便。發現其實佢純粹腸胃敏感。大家唔好以爲唐狗就一定可以粗生粗養。Bell 都係需要食貴糧㗎，都要睇醫生。跟住Bell 甩毛分量同我以前隻哥基差唔多。雖然照顧Bell 嘅時間相對比較長，但係都係可接受範圍。Bell 係好醒目嘅狗狗。一黎就完成高難度嘅跨欄，跳圈或者行S字。最估唔到係Bell 會暈車浪！會係車嘔。宜家仲不停試帶佢上車，俾佢記得坐車嘅感覺，試唔同車程時間，減低佢暈車浪狀況。Bell 初初返到屋企，會係夜晚喊，需要人陪住。後來經dog trainer 指導就解決咗呢個問題。Bell 同自己隻貓都相處融合，無打過交。
好多人詫異，認爲我好有愛心，會選擇領養黑色唐夠。Bell 成日都被人誤以爲係黑色柴犬。搞到自己5歲小朋友都被問到好煩，已經識得學我答人“普通唐狗” 。感覺坊間對黑色唐狗有偏見。自己都無特別去諗呢方面嘅嘢。同埋之前養開矮同細身狗，宜家Bell 高度同身形都會引起我注意，尤其是睇電視時候，佢係電視前經過都會注意到佢。養唔同品種同 size 嘅狗都幾有趣！
有啲咩想同「猶疑緊要唔要領養嘅人」講？
真係要諗下如果領養之後，佢就係你嘅屋企人，以後你嘅人生計劃有任何轉變，你都唔可以因爲計劃轉變而放低佢，反而將佢要放係你安排嘅一部分，納入計劃之中。雖然話唔知佢未來嘅壽命、健康係點、各樣係點，但係你可以做嘅就係帶住佢。好多嘢都有辦法解決，只要你當佢屋企人咁看待，係人生規劃入邊佔一席之位，咁就夠㗎喇！同埋想領養就要有耐性，我都係不斷嘗試（申請），不停撞板，被不同原因而拒絕，甚至乎有啲做埋家訪，到最後都被拒絕。對領養者黎講等待同重複嘅動作或者係種煎熬，因爲未必一次就可以咁順利就成功領養。但係諗到繁殖場就覺得恐怖。唔想再讓呢啲地方利用動物嚟牟利。
對Suppaw嘅意見同要改善嘅地方
Suppaw似一個橋梁，同唔同機構聯乘，好有心好努力做好多嘢。我係一個平台就可以睇好多間平台啲嘢，我又有得揀喔。 所以上年Suppaw 山頂活動我都有參加，就算我隻狗嘔住去，我都願意支持啲咁有愛心嘅機構。同埋想講 Suppaw 係我領養Bell 之後送咗一大盒禮物過嚟，真係好靚，超出預期！我覺得我應該係要捐錢、又捐錢㗎嘛，無諗過仲收到你哋嘅回禮，呢件事真係好窩心！希望Suppaw 可以繼續努力，做大啲，做更多嘢。你哋要加油啊！
