可唔可以介紹一下毛孩？例如年齡、品種、疾病、性格？

冰冰依家5個月大，係細身嘅黑色唐狗，佢性格雖然比較膽小，但佢熟悉咗屋企環境之後，就展露返佢活潑好動嘅一面出嚟！佢非常乖非常聽話亦無咩行為問題，教佢指令都好快學識哂！非常開心佢嚟到我哋嘅屋企！

毛孩係邊度領養？有無背景故事？

我哋喺suppaw x 520浪浪加油站嘅領養日到領養冰冰嘅，520浪浪加油站係由一位主理人打理照顧超過200隻狗狗，我哋知道之後都覺得好驚訝佢點樣可以做到🥹因為我哋本來已經考慮咗好耐決定會領養狗狗，而且我都幾鍾意唐狗呢個品種，當日見到呀冰好文靜又好親人，就決定領養佢返屋企喇！啲義工話係救咗冰冰媽媽返嚟呀冰先出世嘅，所以呀冰係好幸運，一出世已經有義工姐姐照顧！所以嚟到屋企佢其實已經識得喺尿墊到尿尿，都唔洗我哋再另外教佢🙌🏻

領養毛孩之前 / 之後相比，生活有無明顯改變？

都真係有好大嘅轉變，有養狗狗之後每日歡笑聲不斷，有時望住佢自己玩都已經覺得好開心好減壓，當然因為要照顧呢個小生命我哋都要付出好多時間愛心，去帶領佢接觸呢個世界，特別佢仲係幼犬又比較細膽，要一步一步教佢，但見到佢每日都有進步，我都有好大滿足感！

有啲咩想同「猶疑緊要唔要領養嘅人」講？

其實領養真係一件好有意義嘅事，如果有能力時間又打算養毛孩嘅人，真係非常建議領養，除咗話係幫咗一個生命、比到幸福家庭生活佢之外，我哋自己得到嘅分分鐘係更多。另外就係想推介大家，唐狗真係一個好好嘅品種，仲有好多唐狗等緊一個屋企，毛孩帶比我哋嘅互動同歡樂唔應該限制於狗嘅品種，唐狗性格乖巧忠誠又聰明，基因關係亦都比較少病痛，係非常好嘅家庭犬！同埋唔好睇少自己領養嘅呢個決定，每一位領養人都貢獻緊個世界！