Adoption Story #34

2024-05-19

可唔可以介紹一下毛孩?例如年齡、品種、疾病、性格?

我領養咗兩隻貓貓,而家將佢哋兩個改咗名做咪咪奶同奶奶陳,佢哋都係唐貓,兩隻都係大概一歲左右,性格都係好嗲,為食😂

毛孩係邊度領養?有無背景故事?

義工Joey 佢將咪咪奶帶咗去suppaw 嘅領養日,嗰日去到,佢超級親人,伸隻手仔出嚟,我哋摸吓佢個肉球,佢已經煲晒水,之後同佢玩咗一陣,覺得好合眼緣

當時同場仲有好多其他嘅貓貓,但係行咗一圈,都係覺得佢好合眼緣,好想將佢帶返屋企。所以就即刻填表,希望可以領養佢返屋企。

後來聽Joey 同返我哋講,咪咪奶有一日突然之間去咗土瓜灣回收舖,但係超級乖,又好為食,所以氹到回收舖老闆超開心,但係因為老闆怕啲廢鐵跌落嚟整到咪咪,所以就叫Joey 走走咗佢啦

後來Joey 家訪之後,話俾我哋知,領養兩隻貓貓會比較好,起碼可以互相陪伴,冇咁悶,當時我都考慮咗一陣,因為我第一次養貓貓,我都驚自己冇能力照顧到佢哋兩個,Joey同我哋講,可以試吓先,如果唔得,再將另外一隻貓貓帶返俾佢。

所以我同先生一齊去咗Joey屋企,當時見到有好多貓貓喺到,我哋問咪咪,有冇邊個係你嘅朋友仔啊?😂😂你話俾我哋知,我哋帶埋佢返屋企啦

我哋希望佢哋兩個都好夾,玩得埋,最後我哋就帶咗奶奶陳返屋企啦

奶奶陳當時見到係一隻好文靜嘅貓貓, Joey話俾我哋知,佢係好活潑,好貪玩㗎😂講返轉頭,原來奶奶陳之前有另外一個義工領養咗佢返屋企,之後返到屋企同原居民貓貓唔夾,奶奶陳追住人哋隻貓貓係咁玩😂義工迫於無奈要將佢困喺籠入邊,但係咁樣搞到佢好唔開心,所以最後就帶返俾Joey啦

點解選擇領養?心路歷程如何?

當時喺度諗,到底買一隻自己鍾意嘅貓貓,定係領養一隻合眼緣嘅貓貓🐱如果想要名種貓,就真係要去寵物店買先有,但係就算係寵物店,都未必一定合眼緣,隻貓貓同你嘅相處係睇隻貓嘅性格,不如就係真係走去領養日,去睇吓,相處下,可能個性會比品種更加相處得快樂,更加幸福

領養毛孩之前 / 之後相比,生活有無明顯改變?

初初嚟到我哋屋企,奶奶陳都好驚㗎,可能佢驚我哋見到佢咁活躍,就唔要佢,所以佢初期好文靜,你係我哋屋企嗰啲格仔櫃嗰度,逐個逐個窿匿埋,過咗大概兩個星期,食咗好多魚仔,罐罐,三文魚,條條,同蟹柳仔,佢開始主動同我哋玩,我哋坐低,佢就會跳上嚟,我哋去瞓覺,佢哋兩個就會走過嚟😂

另外佢哋兩個之前,屋企得我同先生兩個人,各自各喺屋企對住部電腦做嘢,一係就我出去做gym,之後先慢慢返屋企,而家一放工即刻跑返屋企,驚佢哋兩個冇飯食,行街淨係買佢哋兩個啲零食,而家真係唔使做gym都會瘦,我坐喺地下食番薯,佢哋兩個喺張枱度食緊罐罐😂😂😂

有啲咩想同「猶疑緊要唔要領養嘅人」講?

如果真係好想領養嘅話,真係一定要同屋企人傾清楚,大家都同意,大家之後都會分工合作,鏟貓砂,買貓糧,開罐罐。之後去領養日之前,買晒格仔網,裝晒貓窗先。到時候,去到領養日,遇到合眼緣嘅貓貓,咁就可以即刻申請。去領養日,咁樣可以親身感受吓同貓貓夾唔夾,咁樣會好過就咁上網睇。

對Suppaw嘅意見同要改善嘅地方

N/A

Get notified when new animals are available!

* indicates required

Do you have pets at home?
I am interested in...