Adoption Story #10

2022-08-23

可唔可以介紹一下毛孩?例如年齡、品種、疾病、性格?

🐱張柏芝 & 王菲都係因主人年紀大,自己一個人無能力再照顧佢哋而棄養。接咗兩隻貓貓翻屋企都一個月左右。張柏芝之所以命名”張柏芝”係因爲佢聲沙,根據獸醫判斷就大約5-6歲數。初見柏芝的時候,懷疑佢因壓力過大而 lam 到自己甩毛,直到宜家肚仔同 pat pat 啲毛都未完全生返出黎,只有一層薄絨毛。佢有個癖好就係當無人係屋企時候會走去有布料質地的物件便溺(甚至屋企梳化都已經被犧牲了,已經丟咗,本身仲打算買黎俾屋企另外兩隻貓磨爪用)。為咗布料,擺係狗厠所的尿布佢都會去便溺 (自己曾經暫托過狗狗所以設有狗厠所)。 由於領養前, 自己屋企已經有兩隻貓貓,分別係黑色英短同埋黃色唐貓,但都無阻柏芝同佢哋相處玩耍。柏芝係一隻好癡人,好嗲,好友善的貓貓。剪指甲都無爲難自己。雖然佢還抗拒刷牙,會好用力撐開,但都唔會傷及我。

王菲係一隻灰白色的英短,係我領養柏芝的同時將佢帶埋返屋企暫托。義工話王菲已在中心一個月,自己長時間匿埋,脾氣差,生人莫近咁款。接近佢都被咬傷。但經過暫托一個月左右,我都決定領養埋佢。王菲目前還需要獨處。我本身的巨大貓籠都已被王菲霸占。幫王菲剪指甲係一大挑戰,會咬人,掙扎。雖然目前不能與其他貓貓相處同埋並不親人,但係王菲都有溫柔嗲的一面。佢逐漸可以俾人摸下個頭或者梳毛, 表示王菲都已經稍微放下戒心,喂食時仲發現王菲條脷無倒刺,好似狗狗。

毛孩係邊度領養?有無背景故事?

愛領養動物中心

點解選擇領養?心路歷程如何?

🐱係領養前自己係中意狗多過貓。覺得狗比較熱情聽話,反觀貓貓就服從性低。但係當養咗第一隻流浪英短的時候就瞭解咗當中背後有種種嘅非法繁殖場或者棄養嘅 case 發生緊,所以就唔考慮購買,只會領養。陸續就收養埋屋企樓下見到的黃色貓女。由於自己一個人住,所以考慮再領養貓貓的時候都無任何顧慮, 亦無任何喜好想要咩貓貓,但凡貓貓無太大問題都可以接受。經Suppaw推薦下就決定申請領養柏芝,屋企本身已經有齊貓貓物資以及窗網,所以前後由申請、探訪貓貓、直到成功領養都只需兩個星期内就完成,都好彩順利!

領養毛孩之前 / 之後相比,生活有無明顯改變?

🐱其實因爲自己本身養開貓,所以並無太多的改變。生活主要都係圍繞住貓糧。之前嘗試轉過唔同品牌的貓糧以求貓貓肯食用。之後發現家中貓貓寧願食平價罐頭及乾糧。同埋宜家購買貓罐頭及乾糧的頻率都增加咗。自己亦都會準備定6-7種保健品 (如益生菌、排毛粉、酵素、鱉蛋粉等等) 俾貓貓們輪流食用。

有啲咩想同「猶疑緊要唔要領養嘅人」講?

🐱自己曾經做過BB狗暫托。當知道領養人係完全新手嘅時候都擔心對方係咪有能力照顧到狗狗。自己當時仲叮囑如果養唔掂可以退返黎畀自己,千其唔好棄養!所以希望領養人要衡量下自己是否有能力照顧毛孩。因爲當中涉及嘅隱藏開支都係未知之數。唔好貪一時得意,衝動購買或者領養之後覺得後悔而棄養。就好似自己當初收養的黃貓女, 佢當時其中隻眼有白内障,另一隻眼瞳孔不能放大縮細以及有初期腎病。目前都需要悉心照顧,定期帶佢去睇醫生覆診。其次就係養貓唔同養狗,都要預咗貓貓唔會順住你嘅心意去做,好似狗狗咁叫佢就識得過黎。 但係貓貓其實都有回饋你嘅時候,如果有日佢特別嗲你,你就會乜都OK 晒!

對Suppaw嘅意見同要改善嘅地方

🐱Suppaw 已經好 OK,唔好對義工(工作)要求咁多啦!自己當初想申請的貓貓小花已被領養。但係期間都仲有收到其他待領養貓貓的消息,直到被通知可以領養柏芝就好成功地帶埋佢返屋企,甚至乎之後都有人跟進情況。覺得已經好好啦!

Get notified when new animals are available!

* indicates required

Do you have pets at home?
I am interested in...