可唔可以介紹一下毛孩？例如年齡、品種、疾病、性格？

彈彈同跳跳係一對橘色唐貓，返左屋企一個月左右，宜家我地將佢地改名為哥哥同妹妹。咁當初領養既時候暫托話佢地大約歲半。咁因為妹妹係好依賴哥哥，咁所以當時出領養既時候就已經講明話要一對領養。同佢地生活左一排之後，發現哥哥比當時暫托描述既更親人親貓。哥哥真係天使黎！佢好乖，唔會整亂屋企既野，仲好sweet好嗲人，宜家我地返到屋企，佢已經會比我地隨意摸！而妹妹就係比描述更加唔親人。但呢個都應該關佢以前發生過既野事。妹妹既性格比較cool，唔係好比人掂。但係我覺得呢個都唔係問題，始終唔同貓有唔同性格，更何況妹妹既經歷都真係幾慘，所以我一開始已經有個最壞既想法係妹妹可能一世都唔會approach我地。我覺得佢係我度生活佢舒服，健康就ok。去到宜家返左屋企個幾月，雖然我都仲未係好摸到佢；但係相比啱啱接佢返黎既時候已經好左好多。妹妹會同自已玩得好開心，仲會係屋企無人既時候上我張床，要訓係我個枕頭上面！感覺到妹妹係越來越親人。另外，佢都真係好依賴哥哥，哥哥都真係幫左佢好多架。好好彩有哥哥幫手照顧妹妹，所以妹妹都算係開始習慣家庭生活。

毛孩係邊度領養？有無背景故事？

咁其實開頭係suppaw上有睇啱其他幾隻來自唔同機構既貓貓，當中包括哥哥(彈彈)同妹妹(跳跳)。咁毛守係對於我地既申請覆得最快，佢地既義工對都係對於成個領養過程好清晰。我地當時睇左毛守send比我地既片就好鍾意哥哥妹妹。同暫托溝通同了解佢地既故事同性格後，即使其他機構都有聯絡我，我都無再考其它貓，就決定係佢地。
另外，都特別多謝暫托chole。佢真係好好，講左好多佢地要注意既事項，而其實妹妹既性格係有點怕人同孤僻。咁暫托好客觀同誠實咁講比我知，當初得知妹妹唔親人都有猶豫，咁就推左。但係之後真係成日諗起佢地。所以，最後我都係再搵暫托了解多d佢地既性格同習慣，我覺得都接受到咁就決定領養佢地。
當初彈彈跳跳係係間籠屋裡面比人搵到，比人棄養。咁當時已經發現阿妹有左bb，咁生出黎得一隻貓b，仲要一出世就么折左。因為貓媽媽都好錫仔女，望住自已既小朋友么折對好好黎講都好大打擊。所以妹妹之後就性情大變，變到好孤僻。

點解選擇領養？心路歷程如何？

自從我開始養貓之後，就接觸多左有關領養既資訊。亦了解到其實好多貓貓都好需要我地去幫助。而我上一隻貓貓過身之後，我都有keep住留意唔同機構領養貓貓既資訊。
咁啱合眼緣又有機會，就領養到哥哥妹妹。

有啲咩想同「猶疑緊要唔要領養嘅人」講？

其實了解多左領養就會知道其實好多貓貓都好需要我地幫手。仲有其實成貓都好生性架，比起同bb可以有更多互動，加上佢地有故事，咁領養之後望住佢地既變化，呢種感覺都好特別，好impressive。所以都可以考慮下領養成貓架。

對Suppaw嘅意見同要改善嘅地方

我諗領養好多時令人卻步既位係領養既程序同對領養人既要求。咁好彩suppaw呢度既領養過程都好smooth，好清晰，流程上都唔會拖。而suppaw同毛守對領養人既要求都好合理，唔會好誇張。