可唔可以介紹一下毛孩？例如年齡、品種、疾病、性格？

囡囡今年三歲幾，係一隻比較細膽怕事嘅唐狗女。佢最初好怕陌生人同陌生聲音，但短短一兩個星期，佢就開始慢慢適應入屋的生活，無再騰騰震同匿埋。個樣仲開心哂，而家個body仲好有線條，啲毛仲好滑添。

毛孩係邊度領養？有無背景故事？

囡囡係喺錦田七星崗芳婆婆度領養返嚟。我之前去咗荃灣南豐紗廠，佢哋同suppaw一齊舉辦咗個領養日, 我哋係嗰度見到囡囡同另一隻狗狗Mimi, 佢哋兩個都好乖好得意，都諗咗一陣先決定揀囡囡。因為佢體型比較細，考慮到自己屋企唔算大，所以囡囡比較合適，我哋真心希望有足夠空間提供比佢走動。

點解選擇領養？心路歷程如何？

由細到大都好鍾意動物。細細個時，一路都好希望可以有一日養狗狗，但最終只能夠養倉鼠。長大後，今年年頭開始擁有自己同女朋友的小天地，於是事不宜遲，決定實現自己兒時夢想，立即行動。自己上網做下research, 睇吓啲領養活動，唔使好耐就搵到囡囡了。

選擇領養的原因除了想幫助動物之外，另一個原因係我見到好多真心為動物好的義工，佢哋付出很多時間心機去照顧動物，每次佢哋見到動物可以搵到屋企，都喜極而泣，開心到不得了。所以我覺得領養這件事，是對義工們的一種回應，是一件極度有意義的事，我不想辜負義工們一番心血。你同寵物店或breeder買，他們只不過係想賺錢, 完全只係幫助他們利用動物搵更多的錢。真心愛動物的你們，我唔需要多講，大家都應該明白支持領養才是對的決定。

領養毛孩之前 / 之後相比，生活有無明顯改變？

生活上就真係有好大轉變，以前假日嘅娛樂就係行吓街打下機打吓麻雀，現在就親親大自然。每日至少同囡囡walk兩次, weekend 就walk三次, 仲同佢行吓山，全家都變得好健康，大家都fit咗好多。

有啲咩想同「猶疑緊要唔要領養嘅人」講？

我最想帶出的是其實成犬係相當可愛，聽話，容易訓練。好似囡囡咁，由狗場到入屋，都只需短短兩個幾星期就完全適應。就因為佢係成犬，性格已相對穩定，所以佢完全唔咬爛屋企的物件。我哋返咗工，佢都係好乖咁瞓覺，好文靜，十分容易照顧。整個過程，就當然仲有很多開心難忘時刻。記得最初，囡囡完全唔識行樓梯，由於對我們的信任不足，每次只係行到樓梯面前就停落嚟，亦拒絕嘗試。但經過時日，佢對我們信任增加了，有一日，佢竟然主動行去樓梯面前，望住我哋，就好似話俾我哋聽「不如試吓啦」。於是，我哋就慢慢－步－步咁教識咗佢行樓梯了。感覺就緊係既溫馨又感動啦。所以對新手養狗嘅朋友來講，其實成犬係十分之適合。

另外，試諗下佢哋，每次喺領養日時見到一隻又一隻狗狗BB都俾人領養到，而自己又要返去狗場度繼續等待。我覺得佢哋心情一定好難過。因為佢哋比起BB已有思想感受，所以我覺得他們其實更需要多啲人關注同愛錫。所以我想講，如果可以，請給他們一個擁有家的機會。

對Suppaw嘅意見同要改善嘅地方

對於整個領養過程，若果5分是滿分，我會比4分。我明白義工們好忙好辛苦，所以有時遲咗無覆，亦可理解。我衷心感謝他們，大家好好加油!