可唔可以介紹一下毛孩？例如年齡、品種、疾病、性格？
Annie 係一隻啡色唐狗，女仔，大概11-12個月大。接咗佢翻嚟都有一個月左右。身體非常健康（主人聲稱健康過自己*笑*）。
Annie性格其實就好搞笑嘅，係屋企就好文靜；出到街就變咗一隻好活潑嘅狗仔，扎扎跳好鍾意玩，但係都係斯文地玩。Annie 好親人親狗親貓。有一次去診所打第3支針嘅時候，Annie 基本上對所有“生物”都表現得好靜好乖。
Annie 可以好誇張咁形容非常之乖！係個個人見到都讚好乖嘅一隻狗。一開頭義工 Irene有吩咐可能接 Annie 翻屋企嘅頭幾日都要留係屋企陪佢，第 3-4日嘗試自己出門口幾分鐘再返嚟，睇下Annie有冇咩動靜，例如分離焦慮症之類。但係係完全冇嘅。Annie第一日翻到屋企都完全冇吠過 (好適應新環境)。 而且暫托家庭都有話 Annie 係屋企係好乖，唔會搞破壞。如果真係話有破壞過嘅就只有一次佢咬爛咗屋企少少嘅窗簾布。因爲佢習慣了環境，每晚會走上自己張床訓，可能自己訓緊嘅時候，你都知啲狗好鍾意望出窗口睇風景，加上佢好鍾意啲布質地嘅嘢，就燘過下咁，窗簾布就爛咗一忽仔。但當我話過佢一次之後，佢又好似聽得明咁，就冇再咬過喇！
Annie即使遇到陌生人，或者出門去玩遇到其他狗狗，佢都唔會玩到癲晒，咬人嗰啲。直情好聽教，譬如攞啲零食仔，啲狗就好興走晒埋去搶食，但係 Annie 就會係後面，有少少距離咁坐低自己一個靜靜地係度等食。
Annie見到陌生人嚟屋企都會走去睇下，但係就唔會吠。當初我 settle 完 Annie之後，媽媽同細佬過嚟探訪嘅時候，佢見到兩個人都唔會話吠啲乜嘢。佢都會搖尾。佢真係唔驚人。
毛孩係邊度領養？有無背景故事？
聽義工講 Annie 本身係上水一帶的污水廠流浪。污水廠的員工已經被上司警告不準喂飼附近的流浪狗，如有違反指示，嚴重者會被辭退。有位好心男員工見到 Annie 好親人，同自己都有互動，就唔忍心見到 Annie 再徘徊係呢個地方。於是上網出post 求救，就揾到義工 Irene Lau 幫手。
點解選擇領養？心路歷程如何？
本身屋企都有養緊一隻被領養翻嚟嘅 Poodle。但後來自己搬出嚟住之後就一直想養翻一隻狗，所以都有一路留意領養(資訊) 嗰啲嘅。自己就冇話想要任何品種嘅狗，純粹真係見到 Annie 個 post 咁解。仲有就係因爲自己都見到好多流浪狗，或者 IG 啲 post 見到狗狗好慘。就唔知點解個心就突然爆發好想領養唐狗，所以就不斷上網 search，當中包括 SPCA，毛守呢類機構。後來就發現咗 Suppaw 網站都有呢類資訊，就咁無意中見到 Annie。 申請領養 Annie 之前都有嘗試去申請其他機構再細啲嘅狗仔。但係唔知咩原因想領養 Annie 嘅諗法仲係腦海入面。咁當自己領養 BB 狗失敗之後就嘗試睇下 Annie。當下就叫做 action啦，填表申請同時間去領養日睇下 Annie。
當初申請領養BB唐狗之前都有上 YouTube睇下人哋點樣湊唐狗，或者 Google 睇下唐狗有咩特質。雖然自己一個人住，但係間唔中都有女朋友幫手照顧 Annie。不過 training 方面就主要自己負責翻。
其實由 Day 0 接觸 Annie 到宜家，自己覺得同佢既 connection 係好咗好多嘅。自己唔知點形容呢個感覺。個心情係好開心嘅。尤其是領養咗佢第3個禮拜嘅時候，帶咗佢去彭福玩，約咗托媽同埋佢自己一隻狗仔。咁初頭自己都會擔心 ”哎呀，暫托媽媽之前都好錫佢。佢見翻人會唔會唔認自己咧?” 佢見到人嗰刻係好開心嘅，又會跟住人。自己都有少少妒忌心，但係都戥佢開心嘅，因爲見佢係個好開心嘅小朋友。後尾期間自己行開去洗手間，佢係玩緊時候突然間跑翻我度，跟翻我。好似好驚我走咗咁。嗰一刻我就心定喇！咁證明係佢印象中係有我呢個老豆嘅！只不過佢係見到一啲舊朋友好開心。宜家開始帶佢去散步，直情甩繩，佢都會跟住自己行。目前自己都仲會同托媽保持聯絡，不時分享 Annie 相片近況俾對方知。
暫托家庭訓練得Annie 好好，咁同時Annie 都係聰明嘅。一開頭義工同托媽都交代過 Annie 需要落街去厠所，咁自己就以爲隨便一笪地方都去到喇！但係佢又唔係喎！佢係專要揾一啲有草泥嘅地方先會去厠所。佢唔會係石屎路行行下就屙囉。其實咁樣會感覺好啲嘅，尤其是對一啲唔鍾意狗嘅人可能見到隻狗係街邊屙屎屙尿，會覺得反感。
自從收養咗 Annie之後，近排都有諗過等同 Annie 相處多一段時間，嗰陣自己都有時間嘅話，其實都想試下做暫托或者收養多一隻狗。到時候自己如果有能力，就考慮係咪可以做多一樣嘢，接收多一隻狗或者唔再接收，做暫托，就好似其他托爸托媽咁。叫做救咗一隻（狗）翻嚟，等其他人領養。 希望可以繼續幫到其他狗狗。
領養毛孩之前 / 之後相比，生活有無明顯改變？
以前自己起身梳洗完就直接返工。但自從有咗Annie之後，就變相自己每日都要提早一個鐘起身。因爲 Annie 需要出街大小二便。咁就會帶佢落街行個圈去厠所再返屋企梳洗完先出門返工。收工後就會快快脆食完飯就嗱嗱臨帶 Annie 落街跑。生活因爲狗狗都有改變到嘅，唔會真係冇嘢做嘅時候自己一個匿係屋企。同埋會覺得自己多咗個小朋友，雖然自己未結婚，但係十足多咗個女咁！
有啲咩想同「猶疑緊要唔要領養嘅人」講？
雖然自己都覺得寵物店啲狗狗好得意想買，但係諗深一層，其實仲有其他狗宜家都係度流浪緊，都好慘嘅。雖則有啲人唔認識流浪狗，覺得流浪狗好惡啊，會攻擊人。咁真係睇下囉，即係佢本身生活環境有變化嘅，因爲有啲俾過人搞過、蝦過、打過，所以佢先會咁惡。其實佢哋心地係善良嘅，我覺得。
雖然Annie 真係好乖，但係自己都唔係冇擔心過佢。自己有次帶狗出街，放繩嗰下都曾經擔心過會唔會”走狗“。同埋 Annie 好鍾意同狗仔玩，一見到其他狗狗，就會一支箭走埋去同人哋玩。自己都會驚捉佢唔到，變咗個緊張大師上身咁。咁樣未來都會擔心嘅，萬一走失咗點算咧？咁自己都會諗過呢啲嘢同埋做翻相應措施，例如宜家市面有嗰啲類似GPS 俾狗嗰啲（產品）嘅，咁咪幫佢戴，即使佢走失都揾得翻。自己同時係屋企都有裝cam, 唔係擔心佢咬啲乜，都係自己返工嘅時候開住個 cam，跟住做自己嘢，得閒望下一兩眼，都叫做瞭解下佢，佢自己一個係屋企有啲乜嘢行爲或者生活習慣。
其實我會話真係要擺多啲心機係狗狗度。我覺得唔可以因爲人同動物有唔同，無論狗、貓都好，人嘅地位就一定係高過貓狗。我唔想啲人咁諗囉！佢身爲一隻動物，尤其是狗仔，我覺得同人之間絕對可以做到朋友。即係你唔好當佢係一隻狗。領養翻嚟佢就係屋企嘅一份子。要花多啲時間心機去湊佢同埋要多啲瞭解佢。因爲有啲人領養（狗）翻嚟純粹覺得佢細個得意，見佢大個之後佢個樣唔得意就唔係好理佢啊，甚至搞唔掂就放棄佢或再次俾人做領養。我希望呢啲事情唔會發生。因爲當你決定領養的時候隻狗仔已經認定你係佢嘅主人。點解你又要抛棄佢咧？即係領養嗰刻你都要諗清楚，你係咪可以真係照顧佢一生一世？唔好一時間你見到佢張相好得意（哎呀！BB狗不嬲都得意㗎喇！）嗰下你就好想領養，就唔理（後果）喇！點知領養翻嚟發覺你教佢唔掂啊，跟住咬爛你啲嘢啊，你就開始對佢差。咁其實你要當隻狗好似個小朋友一樣，要花時間慢慢教佢點樣做囉。因爲唔係每隻狗仔都好似 Annie 咁乖，學識睇眉頭眼額，你講完閙完佢一次，佢就唔會做㗎嘛。有啲小朋友就算你閙完都會繼續做。咁你都要保持住一個耐性去教導。
對Suppaw嘅意見同要改善嘅地方
冇，不過都好多謝 Suppaw。其實坊間都有好多唔同機構做一樣嘅事，但係自己覺得你哋做到個堅持都好好。我明白去做一個去救流浪毛孩（嘅工作），你哋付出嘅嘢比我哋想像中還要多嘅，包括地方、時間、金錢。我都希望 Suppaw 可以繼續 keep 住做喇，救多啲未被人救到嘅流浪貓狗。
