可唔可以介紹一下毛孩？例如年齡、品種、疾病、性格？

以前佢地叫叮叮同噹噹，我地一個半月前領養左佢地之後就幫佢地改左個名。宜家佢地叫丁滿同彭彭。宜家佢地係四個半月。佢地係兩姐妹黎既，因為我地估佢地係有流浪過既，所以就唔知邊隻係家姐邊隻係細妹。佢地係領養日同啱啱入屋既時候都好驚青架，係領養日既時候係摸下佢地已經會成身震晒。搭車返屋企既時候見佢地無叫，以為佢地好淡定，點知返到屋企先見到佢地已經瀨左尿。入屋大概一星期後就好返d既。開頭啱啱入屋既時候佢地係連食野都搶住食，好似驚無得食。去到宜家佢地已經好放鬆，想食先會行過去食，甚至會揀飲擇食。
另外，因為我地屋企本身都有隻貓，所以啱啱返屋企既時候佢地都要困一陣籠。咁呢係度就發現丁滿係比較聰明既。用同樣方法引佢入籠既話，佢好快就會識穿。而用係彭彭身上，就次次都成功。

毛孩係邊度領養？有無背景故事？

其實本身我就已經有兩隻貓既，都養左好多年架啦。其中一隻貓就過左身，而另外一隻貓係好需要陪伴既。好巧合地領養日當日，我隻貓就係個度附近火化。咁完成左後又咁啱得知有呢個活動，咁就去左睇下，咁就遇到佢地。其實本身我都有睇到活動既post，咁當時叮叮噹噹其實係無打算去呢個領養日。只係當日有義工病左，帶唔到本身出席既貓黎，所以先由佢地頂上。當日都見到好多唔同貓貓，最後就揀左佢地。之後義工黎左屋企家訪，因為我地本身都養緊貓，咁窗網個d都已經有。所以大概一個星期多少少，我地就接左佢地返屋企。

點解選擇領養？心路歷程如何？

起初開始養貓係因為屋企人喺圍村執咗一竇貓拎咗返屋企，然後我地又絕唔切育，所以又生多一竇貓。咁我搬出黎嘅時候就帶走左其中兩隻。咁所以一路以嚟都冇諗過要買貓。

領養毛孩之前 / 之後相比，生活有無明顯改變？

因為我之前養既兩隻貓都已經係年紀比較大，咁所以佢地黎到我屋企之後我地個生活都有唔同到開頭一星期左右係還好既，不過之後佢地開始進入發情期就變到好嘈，因為佢地會唔想困籠，想出黎。咁因為佢地都比較熱情，同埋好鍾意我本身養緊既老貓，見到佢會撲埋去佢到。所以隻老貓對於佢地都有少少不知所措。因此，我地都要控制住放佢地出黎既時間，要慢慢增加出黎既時間。咁去到宜家，佢地就已經唔再困籠。

有啲咩想同「猶疑緊要唔要領養嘅人」講？

其實見到好附賣貓既人都會配種配到隻貓甩晒毛，身體好瘦弱，當佢地無晒利用價值既時候就唔要佢地。成件事係好殘忍，好陰功。咁所以我覺得領養係比較好既選擇。

對Suppaw嘅意見同要改善嘅地方

帶叮叮同噹噹既義工都係比較好，同埋佢都好有效率。去完領養日當晚已經打電話比我約家訪時間。同埋佢知道我地都需要返工，所以都好遷就我地，特登搭車晚上黎我地度做家訪。