可唔可以介紹一下毛孩？例如年齡、品種、疾病、性格？
佢個名叫TT，係一隻五個月大嘅唐狗BB女。性格就十分百厭活潑，好痴人。每一日佢嘅生活就係玩同食。我本身仲有兩隻三歲狗狗，佢哋而家成為好朋友，每日瘋狂咁玩，入屋完全唔成問題，不知幾開心。TT仲要食好多嘢，有時搶埋其他兩隻狗狗啲食物，真係好曳豬。
毛孩係邊度領養？有無背景故事？
TT係喺520朗朗加油站同Suppaw喺美孚搞嘅領養日領養返嚟。佢啲毛色係灰白色，好特別，我先生話佢好靚女，所以我哋忍唔住接咗佢返屋企。
點解選擇領養？心路歷程如何？
嗰日我同我先生喺美孚食飯，路過見到有領養日，所以就入去睇下。佢哋每隻狗狗都好乖好可愛。一諗起佢哋咁慘無屋企，所以就決定帶一隻返屋企，出一分力。我自己而家諗返，都覺得有啲不可思議。
領養毛孩之前 / 之後相比，生活有無明顯改變？
而家要照顧三隻狗狗，TT又仲係BB，所以變得相當忙碌，每日放工返到屋企，就要收拾清潔。原來照顧多一隻狗BB，真係多咗好多嘢做。不過慶幸佢哋三個都相處得好好，只係玩得癲啲啫。
有啲咩想同「猶疑緊要唔要領養嘅人」講？
對於我哋嚟講，領養一點都唔麻煩，或者啲動物機構會考慮到我哋本身屋企已經有狗狗，對我哋嘅審查都相對簡單。所以我哋都想鼓勵其他人多啲支持領養
