可唔可以介紹一下毛孩？例如年齡、品種、疾病、性格？

路飛同喬巴係同胎兄弟，宜家四個月大左右，港短，即係普通家貓。佢地叫路飛同喬巴最主要係因為男主人好鍾意睇One Piece，同時我地又唔想改d好普通既名，咁所以就用左One Piece既角色黎命名佢地。
性格方面路飛就比較機警，可能因為佢係同胎貓貓裡面最大隻個隻。佢身形明顯大隻過喬巴。佢大一日入屋已經好眼仔碌碌，會觀察住成個環境發生緊咩事。仲記得佢入屋一個鐘前同後都係用同一個眼神望住我。開頭幾日佢都係同喬巴一齊出黎玩。而認識路飛耐左之後，就慢慢發現其實佢都係好痴人，勁嗲人，鍾意成日同我打招呼。佢亦都好為食，見到野食就會發狂。
而喬巴就好貪玩又有少少傻大姐既感覺，雖然佢係男仔。我會形容佢好傻白甜咁樣，因為佢唔會考慮好多野，就係鍾意玩。頭幾日入屋，佢都已經好鍾意出黎同我地玩，成日訓覺都訓得好冧而個樣都好冧。所以佢都係一個好好玩，好活潑既小朋友。

毛孩係邊度領養？有無背景故事？

其實我同男朋友一路都有心想養貓貓既，所以當我settle左搬出黎住既事情後，用左一段時間衡量自身狀況。當我確定係可以養貓貓後，係三月左右既時候，我地就開始係不同社交平台上留意領養資訊，參加不同領養日。咁有一次去左Suppaw係工廈既領養日，本身我地都唔係打算搵路飛同喬巴，因為我地係想領養bb貓，由細養到大。但係，本來申請既一對bb貓因為太多人想養，義工蔡小姐好快就打電話比我問會唔會考慮其他貓。咁所以我地就去左佢既貓舍度睇。一去到，我地就見到路飛同喬巴仲有佢地成班兄弟姐妹。路飛係裡面係好突出，因為佢比較大隻，好醒目。個陣我覺得佢好唔驚人，會主動行埋黎聞下人。而喬巴就攤係度訓覺，唔係好理其他野，與世無爭 。最終都係覺得佢地好cute，一見鍾情，咁所以當晚離開貓舍無耐，我地就決定要領養佢地。

點解選擇領養？心路歷程如何？

其實自己一路都有留意住，都知道買賣寵物背後既運作係好殘忍。開頭都有諗過名種貓，亦有人自己繁殖後問我會唔會想要。但係最終當然無選擇到，因為我地覺得家貓都可愛。而領養既貓貓好多時都係本身流浪既，咁如果無人領養佢地，可能最終佢地都會被放回。所以我地都好堅定要領養。而再諗深一層，家貓可能會仲健康，因為佢地混合左好多品種，基因上suppos會係好d。咁佢地健康d，咪可以陪我地耐d!咁所以我地都選擇左領養。
另外，其實我地都係第一次養貓，咁本身都係打算養一隻先，因為本身都無經驗驚處理唔到兩隻。咁見到好多都話無經驗或者養bb貓都係一對會優先。而去到我真係養左佢地，我都真係完全無後悔，亦都好明白點解養一對係會好好多。個陣義工都有話一對養佢地有個伴，適應環境上會好好多，亦對佢地既健康同心理發展有好大既幫助。而事實上養左佢地，佢地兩個都玩得好開心。其實好多香港人都好忙碌，可能大部分時間佢地都係自己係屋企。 咁佢地有個伴係真係會快樂非常多。就算我地返屋企都同佢地玩，但係佢地兩個自己玩既快樂我地都係感受到。而我地都覺得佢地兩兄弟有個伴可以一齊成長，呢件事都係十分美好。
所以如果想領養bb貓或者義工們建議一對領養，我覺得係有佢地既原因，同埋都真係好好。

領養毛孩之前 / 之後相比，生活有無明顯改變？

生活上既改變都幾大。啱啱接佢地返黎，頭個幾日我都係好長時間同佢地相處，去照顧佢地。咁去到第一日返工既時候，都感受都幾大。第一次離開佢地咁長時間，都真係牽腸掛肚，好似自己做左媽媽咁。會成日諗住佢地係屋企過成點，會唔會有危險，過得開唔開心，有無食野咁。成日都想自己快d返屋企同佢地玩。
另外，以前都會出街食飯行下咁。但係宜家就真係一放工就返屋企睇佢地，要幫主子們開飯剷屎～宜家生活既重心變左係路飛同喬巴，而樂趣亦都多左。每日返屋企佢地都一定係度，望住佢地好開心又無顧慮咁玩，自己都開心埋一份。
同埋，仲有一個好明顯既分別就係宜家成部電話都係佢地既相。啱啱養佢地可以差唔多每日都影超過了100張相！

有啲咩想同「猶疑緊要唔要領養嘅人」講？

對猶疑緊要唔要養寵物既人，我會話真係要諗清楚先去養。因為無論係購買定領養，都唔係一件兒戲既事，而係一世既責任。而呢個責任都係好大。而如果最終係選擇領養，都一定唔會後悔。因為你係拯救左一個生命，而佢地同其係動物一樣都係咁可愛。同埋領養仲有一個好處就係佢地背後既義工團隊都係好歡迎去支援你地，分享養貓貓既各種心得。
所以我會話領養係一個絕對唔會後悔既決定。

對Suppaw嘅意見同要改善嘅地方

都無咩意見啦，大家都好有心，義工們都好好。養到路飛同喬巴都真係好開心，越養越鍾意，佢地已經係我地屋企人。