Adoption Story #20

2023-06-06

可唔可以介紹一下毛孩?例如年齡、品種、疾病、性格?

肉丁(領養前名"溱溱") 宜家6個月大。領養翻嚟果陣佢只係3.5月左右大。係一隻唐狗,毛色係典型的啡黃色。性格好癡人、好嗲。聽義工講肉丁的爺爺係沙皮品種,所以佢有少少皺皮。

毛孩係邊度領養?有無背景故事?

肉丁係小怪獸。流浪記的狗狗。當初係透過小怪獸的 IG 見到一班係洪水橋的狗BB被義工救起。其中有五隻BB生還。由於開始有意領養嘅時候,其他啲狗BB都已被領養,因此就留意到肉丁。肉丁其實係最後一隻等緊屋企嘅狗BB。

點解選擇領養?心路歷程如何?

自己係20年前就養過一隻八哥。直到10年前八哥過身之後,就一直都冇再想養翻隻狗。

至於點選擇解領養,可能係緣分啦!當初想養翻狗嘅時候都係想揾類似八哥或者法鬥呢款,但係都唔 prefer 購買(狗狗)。但係自己都知道如果想領養呢類狗狗嘅機會係好微。直到見到肉丁,其實一開始見到佢啲相就冇乜特別感覺,覺得佢只係一般嘅唐狗。直到參加了 Suppaw 與小怪獸合辦的領養日,即場見到肉丁嘅時候,發現佢好嗲,又好癡人,當時就覺得佢幾得意,果時就萌生想領養肉丁嘅念頭。

自己之前未有嘗試申請領養其他機構嘅狗狗,所以自己係一次過好順利就成功領養到肉丁。

領養毛孩之前 / 之後相比,生活有無明顯改變?

領養肉丁後生活變得好規律。因爲肉丁好準時,每日朝早 6:30 至 7點就會叫醒自己,例如發出聲音或者用鼻碰自己,係床邊叫自己起身。主要係因爲佢想食嘢。其實自己都有10年時間冇養狗,10年後養翻狗,仲要係養BB狗,初頭 pick up 的時間(大概頭一個月),都覺得有少少攰嘅,講真都有啲吃力嘅 (哈哈)。可能肉丁精力又旺盛啦!就算有時同佢落街,佢都係咁衝。但係某程度上,有咗肉丁之後,生活規律咗啦,咁都帶動到自己做運動。如果唔係嘅話,自己都唔會特別係咁熱嘅天氣落街。目前自己同朋友一起住,所以大家都可以分擔照顧肉丁的日常起居飲食。

肉丁見到其他狗狗就會好興奮。雖然話其他細狗主人會擔心自己嘅狗狗被肉丁傷到,不過大致上都冇乜問題。肉丁係屋企唔會亂吠。相對於同胎兄弟姐妹,肉丁都算乖,破壞力不大(除咗買俾佢的玩具,所以要不停買玩具俾佢)。自己有同領養肉丁同胎兄弟姐妹的領養人開 group 互相交流狗狗嘅日常或者有趣嘅事。又或者有時遇到一啲問題,例如初頭肉丁嚟屋企嘅時候,發現肉丁體味都幾勁,之後問群組嘅領養人之後,發現義工提過有機會係轉狗糧或者BB狗嘅體味都比較重。可能加上肉丁嘅耳仔比較細,所以都比較難清理。不過後來可能自己已經習慣咗,所以都OK了, 冇乜嘢了(呵呵)。

有啲咩想同「猶疑緊要唔要領養嘅人」講?

可能一個人會諗自己屋企夠唔夠大俾狗狗活動,又或者諗自己有冇時間帶狗狗落街。咁老實講,自己都暫時未係每日帶肉丁落街,可能都係隔一兩日。但係當然都知道狗狗某程度上都需要一定嘅運動量。但係我覺得都係一個嘗試嚟嘅,無論俾狗狗或者俾我自己,都係俾大家一個機會去磨合。就正如同人,你啱識個朋友,你都需要磨合,並唔代表你一定同佢夾㗎喇!而狗唯一一樣好就係佢唔會去揀人。

其實有啲人可能會俾“一生一世養佢“,呢個少少嘅包袱而自己又擔保唔到啲乜嘢嘅(承諾)而卻步。但係我認爲你為佢付出幾多,狗狗係感受到嘅。所以我覺得你話係咪有好大嘅洗費呢啲,我諗基本如果冇病冇痛,佢又真係唔係用好多錢。咁當然年老、有病痛,係會一定有啲洗費。咁我自己就會每個月可能幫狗狗儲啲錢,直到佢需要用嘅時候,去到果下自己又唔會好肉痛。其實自己可以去諗下做啲嘢,例如去減輕財政上的負擔,從而你就可以減少一樣嘢去諗囖!

就算係有移民的念頭,呢一個決定都不是一時三刻就做得到。過程係需要時間去準備(譬如文件、簽證等等)。你需要認真諗是否可以繼續照顧到狗狗。如果真係屋企人生病而冇辦法要被逼放棄狗狗,你需要有backup plan是否有親朋慼友可以繼續照顧狗狗。你冇可能掉佢出街,就等如你唔會掉一個人、一個小朋友或者一個BB出街㗎嘛。

對Suppaw嘅意見同要改善嘅地方

覺得Suppaw都幾有心。真係見到你哋同義工合辦領養日,令自己成功領養肉丁。亦見到 Suppaw IG 都有唔少 post 幫助貓狗揾屋企。咁我都好欣賞嘅。我甚至都有同朋友分享Suppaw,叫佢哋多留意呢一個機構。

Get notified when new animals are available!

* indicates required

Do you have pets at home?
I am interested in...