可唔可以介紹一下毛孩？例如年齡、品種、疾病、性格？

阿Bu係唐狗嚟嘅，大概五個月大，係男仔。佢係有皮膚敏感，非常之敏感。

毛孩係邊度領養？有無背景故事？

第一次見佢嗰時慘慘豬，咁樣自己柄埋一二角，唔同其他狗BB，會主動撲上嚟，好討人喜歡咁樣。佢自己好Blue咁樣坐埋一邊，跟住個頭又有一撻疤痕，好似俾人蝦完咁樣，所以我哋改佢個名叫做阿bu，又Blue又俾人Bully。

義工都冇諗過佢係第一個出嚟嘅，感覺佢唔係咁容易俾人帶得返屋企，佢反而係同一堆BB第一個俾人領養，湊佢個義工都好surprise。

點解選擇領養？心路歷程如何？

其實自己本身鍾意狗，喺想養狗之前就有睇過啲品種嘅，一search狗仔就睇到有好多嗰啲唐狗嘅相，咁我鍾意唐狗，於是就去search下啲領養網站。其實我以前自己冇接觸過，冇養過寵物，亦都冇留意開嗰啲動物機構，係自己突然間想用狗仔就開始follow咗好多呢啲動物嘅領養機構。見到每隔一至兩日就會有啲新post呼籲人領養，好多狗狗BB生咗出嚟之後冇人湊，嗰時就覺得一定唔會購買而選擇領養。再加上唐狗呢個品種都適合新手，所以先至揀。我原本都有諗過柴犬，不過為咗大家好就未必揀呢個品種，因為驚自己handle唔到。我會話都係緣份啦，當時send咗幾個嚟，我就係對呢隻刀疤狗有興趣，本身都有擔心過佢條刀疤嘅位置會唔會冇毛，生唔返毛出嚟，但係點知而家都冇啦，淡晒都睇唔到咁滯，可能佢係BB仔新陳代謝好。

阿Bu頭幾日返屋企好文靜，好叻嘅，返嚟第一日已經識得定點大小便，佢會擺個好抑鬱嘅樣出嚟，搞到好似好惹人垂憐咁樣。佢好合作啦，又冇乜不良習慣，我見好多BB都會食便便呀，咬尿墊嗰啲佢全部都冇嘅。第三日仲識對住我哋笑添。後尾頭一個禮拜適應咗之後佢就活潑咗好多，佢係屬於乖嘅，好聰明。個性格就好似保安隊長咁樣，成日都會去巡邏全屋嘅，我哋瞓之前佢會去巡一round，然後佢瞓之前又會去巡一round，到而家入咗屋大概五個月都係咁，佢係要等爹哋媽咪都喺床上都係會咁樣巡。

佢係好敏感嘅，好容易對啲門口聲好好敏感好警覺嘅，佢瞓得腍都會趷一趷起身，不過佢又唔係話係不斷吠嗰啲。本身都唔知佢係敏感，以為佢係生癬，好多小傷口。之後發現其實係佢自己搲同埋咬出嚟，我地帶過佢去睇好幾次醫生，最近醫生就幫佢打咗支敏感針，情況就改善咗好多啦，而家都睇吓搵唔搵到啲食療作爲替代，費事長期倚賴打針。

領養毛孩之前 / 之後相比，生活有無明顯改變？

而家我自己生活上都好大分別啊，會好早起身。阿Bu係好有時間觀念嘅，我哋幾點起身返工，佢就會差唔多時間去到床邊。食嘢又係啦，起身第一件事就係喺廚房等，就算你個人喺廁所刷緊牙，佢都會係門口等你，所以我會早起咗囉。同埋好多母愛寫晒出嚟囉，好似當佢BB，多咗個仔咁，好多嘢掛住佢，又變得唔會嫌核突，會觀察吓阿Bu嗰啲便便，日日都捉住佢好似捉蝨咁樣睇住佢啲皮膚狀況。

我返工日日都會望住個cam，一離開佢就抑鬱咁樣，我為咗佢專登裝cam，因為佢長時間喺屋企。跟住一放工就即刻衝返屋企，我自己冇晒社交，淨係希望佢可以有社交。我開始follow啲狗page，自己冇晒社交，但我會想佢有朋友，不過又唔想養多隻，所以就幫佢開IG其中一個嘅原因，係想幫佢識朋友，因為咁樣可以識到好多狗仔。不過而家因為未打齊針，所以未約過其他狗仔見面，加上都要夾一啲係同區嘅先得。

我而家成個專注力都係Focus晒落去佢嗰度。自己未養狗之前，我會唔明點解啲人會話狗狗係自己仔自己個女，有時覺得寵物就係寵物，不外乎一隻貓囉一隻貓狗囉，但而家養咗佢之後就覺得，佢真係我個仔，緊張到佢不得了囉，BB一樣，瞓覺又要氹嘅，又要摸嘅。

阿Bu入屋頭一兩個星期嗰陣覺得自己handle唔到，之前原本覺得應該好容易，唐狗都係粗養㗎喇，又少病痛啦，都應該唔使搞咁多嘢，唔使咁緊張。但到頭來我頭一個星期係完全瞓唔到覺，佢一有少少動靜，我就望住個cam，睇住佢做緊乜。另外佢有皮膚敏感問題，，搞到我好緊張，佢食乜嘢我又好緊張，所以真係冇諗過會係咁。但好在，頭一兩個星期我自己都好擔心會唔會搞唔掂，不過慢慢適應之後，大家變成一家人之後就冇乜嘢啦。中間我都曾經有唔開心過，懷疑過自己係咪適合養狗。點解人養狗我養狗，我會樣樣都好似咁緊張嘅。

有啲咩想同「猶疑緊要唔要領養嘅人」講？

如果本身考慮緊養狗嘅話呢，領養係可以改變佢哋一生嘅。同埋真係有好多等緊一個屋企嘅毛孩，所以如果本身係愛動物又可以承諾一生照顧佢哋嘅，而又有一個安穩嘅家，就真係帶佢哋返屋企啦，等佢哋有個機會知道咩叫做愛。

對Suppaw嘅意見同要改善嘅地方

我會想讚下Suppaw，我哋去七星崗嗰度睇阿Bu，第一次見到阿bu，佢哋就喺錦田站嗰度pick up我哋，車我哋入去，佢都知道七星崗呢個地方好難搵，同埋我哋都有話咁好嘅車埋我哋，跟住佢話想優化個領養流程，希望可以比多啲機會毛孩。成個流程都好快，我好似由reach out Suppaw開始到帶阿Bu返屋企都係兩個星期嘅事。

我覺得兩星期真係好快，同埋整體好容易溝通所有嘢，嗰邊嘅義工同埋Suppaw都好容易溝通到，事關我哋想盡快帶阿Bu返屋企，幫佢打埋第一針先嘅，我哋就唔想Miss咗佢BB嘅時期嘅針。由於好快安排得到所有嘢。如果10分滿分，我會比10分。

另外，因為本身阿Bu唔喺你哋個website嘅，我本身係想領養其他狗，但係點知其他已經有屋企俾人領養咗，跟住Suppaw好快咁樣send咗幾個BB資料俾我，問我佢地係啱啱救返嚟，兩個星期左右大，有冇興趣。所以我覺得成個整體流程都好好。