可唔可以介紹一下毛孩？例如年齡、品種、疾病、性格？

🐱麻糬媽媽2 歲，係一隻靚女梨花紋貓貓。柑柑仔仔約9 個月大，一隻黃色貓貓。仔仔好多嘢講，身形比媽媽稍大。麻糬好愛錫柑柑， 平時會讓仔仔食嘢先。兩個都係驚青貓。但係麻糬會表現得强勢少少，識得保護柑柑。

點解選擇領養？心路歷程如何？

🐱想領養但係都猶豫過自己係咪可以handle 貓貓。機緣巧合之下幫咗朋友暫托貓貓3個月，俾咗自己一個練習養貓嘅機會。

有次無意中見到電視節目介紹 Suppaw，就上網搜尋，一上去就睇中麻糬同柑柑。睇中麻糬同柑柑之後，Suppaw 好快就將我嘅申請轉交俾義工 Sally。Sally 作出初步家訪，指點下貓網需要加固或改善的地方。之後就約睇貓貓瞭解下佢哋。好快就成功領養兩母子，全程大概一星期左右就完成！自己都好慶幸先生事前已經好認真地安裝好窗網，義工第一次家訪都已經稱讚！

兩隻貓貓都長期有食 Lysine。但係當初接貓貓返到屋企的時候，佢哋就有咳、打乞嚏同肚疴嘅情況，兩母子好快就需要睇醫生。前後麻糬都睇咗幾次醫生，食藥食咗一段時間。 由於餵藥嘅工作都係先生負責，所以兩母子就好怕先生；自己只係負責餵食，所以貓貓都比較中意自己。仲記得帶貓貓去睇醫生嘅時候，自己都要花一番功夫先成功將貓貓入袋；媽媽第一次入袋前就周圍走，好惡，不斷掙扎，甚至爪傷自己同先生的手，入袋後都不斷會叫；仔仔係會爪實周邊的嘢不讓自己入袋，入袋後就變得好靜。目前爲止兩母子都係仲係比較驚青怕生，有陌生人到訪都會匿喺貓屋。

領養毛孩之前 / 之後相比，生活有無明顯改變？

🐱領養麻糬同柑柑後，每晚收工番到屋企都會陪貓貓玩，不知不覺就已經好夜，覺得時間過得好快！每次出街都會心掛掛兩隻貓貓，希望早啲返屋企見佢哋或者返屋企餵完佢哋再出街。而家行街都會去多咗寵物店買玩具或零食俾佢哋。自己同先生都當兩母子係自己的小朋友一樣看待。過去兩個月由於自己 WFH, 所以陪貓貓的時候比較多。貓貓們開頭都習以爲常，唔會太黏身。而家每日都需要返 office，而令貓貓們變得黏身，無見自己一段時間就會識得沖埋嚟搵主人。

有啲咩想同「猶疑緊要唔要領養嘅人」講？

🐱雖然購買貓貓係個人選擇，但係都希望大家支持領養，減少不必要嘅繁殖或棄養。同埋領養人要理解下義工嘅唔容易之處。好多獨立義工由救援工作至到領養手續，都一手包辦，自己又見到唔少貓貓意外案例，所以無論購買或者領養貓貓都好，安裝窗網工作不能馬虎，係一定要嘅！

另外就係俾多啲信心耐性去同毛孩相處。就譬如話自己嘅貓貓，我覺得佢哋係好有人性，我會嘗試不斷同佢哋溝通，安撫佢哋，佢哋都識聽話。