可唔可以介紹一下毛孩？例如年齡、品種、疾病、性格？

🐶5月13日帶Philip 翻屋企。Philip 大概 1.5歲，性格慢熱，都溫順，好乖，要相處一段時間後先同你熟絡。暫時唔算親人，見到陌生人都會吠。如果佢嬲起上黎係會撐到好行，扯都扯唔郁佢。但係佢都好溫柔會錫住我哋主人。伸手喂佢或者伸手去佢嘴度，佢都會停止咀嚼驚咬親我哋。


點解選擇領養？心路歷程如何？

🐶 當初養咗17年嘅狗(名Happy) 舊年已經因癌症過咗身。我全家都好傷心。哽咽 都用咗一段好長嘅時間先恢復情緒。本身都有啲猶豫好唔好再養狗，因爲好怕好快又要面對生離死別。 但我見兩個女都大個啦，我兩公婆係屋企都覺得好悶，就想養返隻狗有個寄托同陪伴。會當佢BB 咁凑。



我哋養狗都有經驗，係内地就開始收養Happy 。果陣佢有皮膚病，後來學識咗由食物落手改善 Happy嘅皮膚病，之後更加勞師動衆帶埋 Happy黎香港同我哋一齊住。Happy 係一隻好乖好懂性嘅狗。（不斷回憶返過去養Happy 嘅日子）所以領養Philip 後，我哋都好開心。 


選擇領養係因爲覺得出面義工中心啲狗多數都係被人遺棄，同埋見到身邊好多啲朋友一時心血來潮去養狗，點知發現隻狗唔聽話，又亂咬嘢之後更加遺棄佢哋，所以自己認爲反正都係養狗，點解唔選擇領養，俾隻狗一個家，俾安全感佢？如果我哋好想養狗又繼續攞錢買狗返黎，咁變相義工中心啲狗就少咗人去領養啦！同埋當然啦，係香港買隻自己鍾意嘅狗都好貴，咁我唔想花呢筆錢咯！

領養毛孩之前 / 之後相比，生活有無明顯改變？

🐶 養咗 Philip 之後，心裏就多咗份牽挂係度。我哋兩公婆都要返工，所以一放工或者得閑出街都會記挂住屋企有隻狗，要快啲翻去照顧佢。


有啲咩想同「猶疑緊要唔要領養嘅人」講？

🐶 領養前一定要諗清楚自己有無咁嘅耐性，當佢小朋友咁去教，去養，去照顧佢一生一世，照顧佢嘅生老病死。真係要當佢人咁看待，愛錫佢。唔好貪一時衝動養咗之後唔要就棄養。狗雖然唔識講人話，但係佢哋好有靈性，有表情有感受。換著係你身邊嘅親人，你會唔會遺棄佢？唔會㗎嘛！所以你當隻狗係親人，係無可能遺棄佢。


對Suppaw嘅意見同要改善嘅地方

🐶 Suppaw 員工同埋跟進 Philip 嘅義工都做得好好。義工Irene 真係盡心盡力。對Suppaw的員工都無言感激。唔係因爲金錢上或者工作需要先咁努力，唔怕辛苦咁樣幫我哋順利領養。大家都好好！