可唔可以介紹一下毛孩？例如年齡、品種、疾病、性格？
Adora (原名小丸子) 3 個月左右大，比較細膽。自己其實係上網幫狗狗起呢個 "Adora" 名，個意思係“受鍾愛的人”。聽義工講本身 Adora 媽媽一胎有11隻狗狗；10女，1男。但係男BB狗一出世就夭折咗。
其實Adora非常痴人。但係痴人得嚟又識得判斷熟人定係陌生人，認真好犀利。因爲自己冇特別教過佢，而且佢翻咗嚟屋企都只係一個月左右，見過嘅人唔算多，就算自己朋友其實都唔係好多上過門。同埋目前爲止佢都只打咗第一針所以暫時未能帶佢落街。 平時屋企有朋友過嚟，Adora 會好熱情，好痴對方。但係有一次自己唔係屋企，Adora 同自己女朋友等兩位電工上門修理少少嘢。Adora 見到兩位電工時候就戰鬥格上身，好緊張，好少有地吠人。印象中 Adora 會吠嘅時候都只係初初翻到屋企，我第一次出門或者訓覺時而佢係廳嘅時候先會咁樣，但都只係吠一兩下，之後一直都冇吠過。
Adora 係已經被訓練得好好。係一隻好精叻嘅狗狗。初頭翻嚟就識得係尿布大小二便。目前都仲有做基本指令訓練。基本上佢都聽得明，好快學識。例如 sit指令，我遞隻手，佢都會坐低（有時興奮得滯就唔理你嘅啫 ）。喂佢食嘢都會叫佢坐定幾秒先開始食。只係近排比較曳，屙完係度踢大便。如果話有冇搞破壞，其實都會有嘅。佢都已經毀掉屋企梳發兩舊大咕𠱸，將拉鏈咬爛咗。跟住買俾佢嘅狗床個 tag位底部都被佢咬咗個窿仔，搞到啲棉花走晒出嚟。屋企目前就爛咗呢幾樣嘢。不過因爲平時係屋企都係放 Adora 周圍走，冇入籠。自己個梳發有用張冷氣被包住。Adora 初頭2個星期都冇咬，但係宜家已經開始咬了。但係呢啲都係小事嚟嘅，總括嚟講我覺得 Adora已經好乖㗎喇 ！好得意嘅係佢係識得分辨咩食得，咩唔食得。例如咬出黎嘅咕𠱸棉花或鐵綫，佢都唔會吞食。
平時自己係度訓覺同 Adora隔住道狗欄，佢都會細聲呜呜叫。但係有一晚佢突然發脾氣爪爛狗欄支撐住既薄身墻，直情爪出個窿仔。嗰時自己有教訓過 Adora，佢知驚之後就一直冇再爪個墻身。雖然當時佢有嬲咗我一陣（强調只係一陣），但係佢好快就衝埋我度，痴住我。其實都算好好㗎喇。相比較之下，自己兩位生意拍檔都有領養狗隻，分別係史纳莎同 Poodle。大家都有交流過，發現其實Adora係乖過佢哋好多。對方嘅狗狗唔係脾氣差，比較嘈就係身體健康有啲問題。
點解選擇領養？心路歷程如何？
認識 Suppaw 係透過犬隻訓練師恩 Sir 及另一位前商分會朋友嘅介紹。Adora 其實係自己一嚟係 Suppaw 平台就睇中嘅。覺得佢好得意，於是就做申請，同義工約時間探訪。一見到 Adora 嗰刻就已經好鍾意佢。跟住暫托家庭都有俾時間自己考慮清楚，同埋過兩日約做家訪。好快成件事就已經順利搞掂咗（大概一星期内）。自己由開始揾領養平台直到成功領養都係一個月左右嘅時間。自己都知道好快 -- 由 aim 想領養3個月以内嘅狗仔同埋自己想由細個開始養，自己又聽生意拍檔見解提議我領養細狗仔，擔心再大啲嘅狗狗有記憶就比較難處理。
其實自己都考慮咗好耐，先做呢個決定（養狗）。之前同前任因爲各自太忙，加上想要狗嘅品種上意見有分歧，就一直未能實現到呢件事。再者自己單身嘅時候都擔心過未必有時間應付到，就算個心好想養狗，但係都得個諗字。自己父母（雖然唔係一齊住）就成日都叫自己諗清楚驚我一時衝動同冇時間照顧隻狗。同埋父母本身都怕狗，所以就一直都拖延。後來自己個女朋友都好鍾意狗，提出想養狗，所以佢就主動上網揾領養資訊。好巧合地搜尋到合眼緣嘅狗狗都係唐狗爲主（事前自己都冇指明要任何品種嘅狗）。
自己其實係其他機構都有申請過領養狗狗。不過最大問題就係自己屋企唔大，得嗰300 呎。我明白理解有啲機構係擔心自己屋企比較細，而唐狗可以去到好大，就唔夠活動空間咁樣。其實試過有一個幾乎成功領養嘅例子，開頭同義工都溝通良好，不過對方拍檔睇完我屋企段影片就覺得屋企細得滯，就 ban 咗我（嘅申請）。嗰陣自己都好失望。其實自己最大感觸係有次自己去探訪某個機構自己睇中嘅狗狗，當期時見到好多狗狗年齡都好大，就覺得機構可能（要求）過份嚴謹而放唔到啲狗（俾人領養）。自己其實都尋求過其他人意見，將自己資料列出嚟，除咗屋企唔係好大之外，自問都符合對方要求而且有過之而無不及。因爲平時狗狗我都可以自己帶返公司湊，俾佢周圍走。再者遲啲自己個 Office 會再搬大啲，有更大地方俾佢玩，任佢跑。加上自己生意拍檔都會帶狗返公司，有更多時間可以陪佢，俾機會佢哋相處。所以真係唔知機構準則係點。
當初自己點解唔嘗試暫托咧？因爲覺得暫托俾我嘅感覺似係一個朋友嚟我屋企咁樣囉。同埋自己係外國讀書時候都有照顧過一隻細銀狐嘅經驗。雖然隻狗係朋友嘅，但係自己照顧隻狗嘅時間多過個原主人，所以我就唔擔心自己處理唔到。
如果話狗狗有任何事情發生，會點解決呢？話說自己返工都只係需要出門 5-6個鐘就可以翻嚟（屋企）㗎喇 ！自己住所同公司都唔係距離太遠。如果自己夜晚需要出街，我都會翻屋企喂咗 Adora 先至再出去。咁如果話自己真係要遠行，我都有個住係附近嘅朋友可以幫我照顧到隻狗。朋友都有上過屋企同 Adora 玩，所以大家都熟絡，加上朋友自己都有養狗。Adora 因爲 12月先會打第2針，可能到時朋友先會帶狗狗過嚟屋企同 Adora 認識相處。所以其實都有晒 backup plan。同埋自己屋企都有裝 cam 同 Adora 傾偈。自己平時返工得閒或者係出面都成日開住個 cam 睇住佢。見佢訓醒都會開嘜同佢傾下偈。Adora 好醒目，一聽到開嘜雜音就會開始擰轉頭望 向cam 行埋去行兩轉。
相比較其他有品種嘅狗嚟講，自己本身係比較鍾意唐狗。自己一開頭就好肯定唔會買狗。自己一定唔會支持買狗呢樣嘢。將狗變爲一個生意模式去做，老實講，自己都係生意人，我覺得你係繁殖場又好或者養出嚟嘅都好，如果係為做生意嘅，我心態上係唔想去接觸呢啲嘢。 我唔想俾你賺呢啲錢囉！就算話自己去執翻嚟養都未諗過。一心只係想領養。 咁樣當然有啲狗我都會鍾意嘅，除咗唐狗之外，我都鍾意靈緹。但係基本上靈緹呢啲冇得領養 ，咁樣選擇之下，我會揀領養唐狗。同埋我個人都唔想機構啲狗因爲出唔到領養就被人道毀滅，真係好慘！
領養毛孩之前 / 之後相比，生活有無明顯改變？
明顯改變就係個心每日想早啲翻屋企。因爲知道自己多咗個活動要喂 Adora。而其實都好開心因爲屋企多咗個新成員，變得熱鬧咗。Adora 又好嗲人，睇電視會走埋嚟係自己同女朋友之間坐。因爲有佢，自己同女朋友關係都好咗好多。因爲兩個人同時間去照顧一個小朋友咁樣，要一齊去完成一啲事情，譬如成功幫狗冲涼，呢啲小事都令大家好開心，生活多咗唔少開心細節可以分享，大家都有一個共同方向咁。我哋宜家都仲會同暫托媽媽保持聯絡，大家都會互相 update Adora 以及 Adora 姐妹啲相或近況。而女朋友就 join FB 唐狗群組（托媽都在群内），所以大家都會係群組 share 相，溝通。
Adora 根據獸醫同身邊人話，都會係一隻身形偏大既狗狗。第一次打針時候，已經重達9kg左右。雖然係重，但係佢目前身形都仲好 fit，因爲佢係屋企會不斷周圍跑。呢排都有嘗試俾佢走出屋企走廊。佢都識得跟住自己翻入屋，唔需要叫。同埋自己最近聽身邊人講，學識狗狗原來會因爲動物排泄時間係最冇安全感嘅時候，所以當我或女朋友去厠所嘅時候，佢係會守住我哋，自己擰轉面坐低望住（厠所）出面。呢個時候佢唔會騷擾人，好乖守住出面，唔似平時咁衝上嚟嗲人，踮住你。最重要係本身怕狗嘅父母都成功被Adora 俘虜咗！
有啲咩想同「猶疑緊要唔要領養嘅人」講？
要諗清楚自己個責任係邊度。有時有啲人一時衝動，你唔好諗到自己覺得得嘅時候，就發覺（原來）自己 handle 唔到。譬如狗係屋企搞破壞嘅話，我覺得呢啲係佢哋本性嚟嘅。唔好到時埋怨。覺得狗狗唔啱養又剩。
對自己嚟講，一開始最大 concern 就係時間問題。雖則自己出門時間都只係5-6個鐘，但係可能都會唔穩定，驚陪唔到狗狗。但因爲宜家身邊有個人可以幫手照顧狗狗，加上有共識想養狗，所以先會決定領養。當然自己因爲好鍾意狗，如果自己一個有足夠時間同能力嘅話，我都會選擇領養，只不過現時女朋友加快促進件事。都算係了咗自己一直想做嘅事。
對Suppaw嘅意見同要改善嘅地方
感謝 Suppaw，覺得 Suppaw 可以做到一個中間人角色去協調兩邊（義工及申請人）嘅嘢。總比義工同申請人直接聯絡溝通好。因爲當中可能有conflict, 誤會。呢樣嘢真係有心先可以做到。個人認爲Suppaw 身爲中間人角色好重要。因爲有時義工溝通嘅能力上面可能有限（未必有時間處理咁多事）加上可能只見到片面嘅嘢就錯過一個申請，所以 Suppaw 一嚟就可以從中去幫義工過濾申請資料，二嚟幫申請人同義工做到協調。Suppaw 嘅過濾工作同時都保障了義工同埋申請人。香港有無數義工團體，Suppaw 可以同更多獨立義工合作，幫更多流浪狗狗。因爲呢類義工未必有足夠門路去話俾人知手上有毛孩等緊屋企。大型機構由於運作成熟，所以可能未必需要太多援助。
