可唔可以介紹一下毛孩？例如年齡、品種、疾病、性格？

Milo而家年齡就係三個月多大左右，佢係一隻啡色嘅唐狗。我哋喺開頭第一日喺領養日見到佢嘅時候，佢係一隻好平靜好冷淡嘅狗仔嚟，個樣好可憐，隻眼耷耷地。不過之後接咗佢返去之後就活躍咗好多。我哋留意到佢啲puppy bite勁咗啲，多咗咬嘢。佢好少會吠，除非我哋出咗門口或者行開咗咁佢先會吠。佢係一隻好為食嘅狗仔嚟，只要有嘢食就OK。

照顧佢嘅義工都有講過，佢應該係唐狗混咗拉布拉多，因為佢個樣係比較似拉布拉多，淨係條尾唔似，因為佢係卷尾，好似柴犬嘅嗰啲尾。所以除咗條尾之外，其他地方就好似拉布拉多。

毛孩係邊度領養？有無背景故事？

其實我由細到大一直以來都好鍾意狗，以前我做sales嘅工，每日工時太長，所以唔係太過適合養狗。之後呢一兩年轉咗做Office工，時間上充裕咗，星期六日可以留時間喺屋企陪狗仔，所以決定申請領養。我係喺Suppaw同告別流浪天地喺上環搞嘅領養日到領養佢，其實最開頭申請時係冇報到呢一間，係申請咗其他機構先，可惜最後都係揀唔啱，亦冇批到俾我地。係跟住機緣巧合之下，我女朋友喺給網上見到呢一間啲狗仔，睇啲相好似幾得意，於是就留意到呢一個領養日。當時我哋原本係想揀另一隻狗仔而唔係Milo，不過去到領養日嘅時候我地見到Milo，又覺得幾啱眼緣喎，最後就選擇申請領取佢。

點解選擇領養？心路歷程如何？

我本身係好鍾意秋田犬嘅，不過因為好少有領養到秋田犬嘅機會，加上我地覺得新手唔係太適合養秋田犬，咁就諗住唐狗會好啲。我地始終領養係好啲，因為會想幫吓啲狗仔，等佢哋冇咁慘，再加上亦都唔想幫襯出面嗰啲無良繁殖場，所以就選擇咗領養。

領養毛孩之前 / 之後相比，生活有無明顯改變？

佢而家朝早每日都好早六點就會起身，好準時要食嘢，佢係一隻好為食好為食嘅狗嚟。因為要湊佢，我同我女朋友而家每日放假都會留喺屋企，對佢嘅時間多咗，好少出街。與此同時，因為幼犬一日要食幾餐，令我阿媽都留多咗喺屋企，佢而家要趁我哋晏晝屋企冇人嘅時候留喺屋企餵佢。同埋屋企嘅嘢放置得比較整齊咗好多，唔會亂咁擺，因為Milo見到咩都會擺入口咬。

我地亦都會擔心多咗佢嘅健康。我最近見到佢啲尿量比較少而又去多咗廁所，擔心有啲咩事，就帶咗佢去睇醫生。醫生話佢下面有發炎，佢話呢個情況喺幼犬都幾常見，話食幾日藥就會好返。

有啲咩想同「猶疑緊要唔要領養嘅人」講？

可以俾人領養嘅狗大部份都係唐狗，所以都幾建議第一次養狗嘅人可以考慮領養，始終比較容易教，聰明啲。我哋都係第一次養狗嘅人，相信都冇其他品種咁難搞，感覺會比較好啲。

對Suppaw嘅意見同要改善嘅地方

都會想多謝Suppaw，唔係嘅話都未必有緣份撞到Milo。