Adoption Story #29

2023-11-20

可唔可以介紹一下毛孩?例如年齡、品種、疾病、性格?

Nolan而家叫Murphy,佢三個半月大,係一隻唐狗。我唔肯定佢混咗乜嘢品種,佢同胎嗰幾隻都唔係好似樣。

佢就冇咩大嘅疾病,唯獨係腸胃差啲,可能始終都係流浪狗,或者母犬本身腸胃唔太好,生出來嘅小朋友都容易肚痾。我地同佢睇過幾次醫生,keep住有俾佢食益生菌,等佢慢慢改善返個體質。除此之外佢冇乜特別大嘅病。

性格方面Murphy好聰明,佢學得好快,因為我哋有搵Trainer同佢上堂,佢都好快上手。佢係超級痴人,我哋行到邊佢都會跟住去邊,譬如我哋行到廁所,佢都會跟住我哋。Trainer話佢係一隻挑機嘅狗狗,會挑戰吓你咬下你,需要好多耐性去對待佢。佢之前都係同佢嘅foster同另一隻狗仔一齊住,導致佢唔係可以好快獨立,就要Train佢,例如用離家訓練等佢獨立啲。我哋唔主張會去打佢,通常都係透過讚佢好嘅行為,等佢認得呢個行為做完之後係會俾人鼓勵,盡量令佢好快學識。此外佢都係會有一啲幼犬普遍會有嘅問題,例如puppy bite。

Murphy始終係一隻唐狗,大狗嚟,所以而家三個月大已經有十幾kg,一兩個星期就重一兩kg。佢整體係一隻好有Energy嘅狗仔。因為佢而家未打齊針,我哋帶佢落去行嘅時候就盡量會推車仔或者放入個袋俾佢望吓嘢,等佢精神上都會有啲攰,返到屋企就會冷靜啲,因為佢始終都要有能量上嘅發洩。而家佢都融入到屋企,適應得幾好,係一隻好乖嘅狗仔嚟。

毛孩係邊度領養?有無背景故事?

我本身以前有一隻西施狗,養咗都成十一年,佢上年過咗身,之後我一直都好傷心,因為同隻狗嘅bonding係好深,佢係我第一隻養嘅狗。

之後我一直都有睇吓啲流浪狗嘅post諗吓要唔要領養。我同我男朋友搬咗出嚟住,一直睇好多唔同機構搞嘅event,不過時間上一路夾唔到,直到咁啱喺正屋企附近有一個event,我哋就去咗睇。我哋去領養之前都已經睇咗幾隻俾人領養嘅狗,係同胎一齊出嚟俾人領養,然後已經特別mark咗Murphy,因為佢個樣係咁多隻入面我自己最鍾意嘅。我去到嘅時候,見到Murphy同另一隻狗仔Milo係兩隻自己一齊玩,覺得都幾合眼緣,所以就領養咗佢。我會覺得自己隻狗仔過咗身,自己有能力嘅情況下,就想領養啲流浪狗。

呢個機構啲義工都好Nice,好貼心,要準備啲乜嘢又會有follow up, keep住有佢哋磅住,成個領養過程都好順利。

點解選擇領養?心路歷程如何?

因為都有留意香港流浪動物嘅新聞,入咗好多Facebook嘅group。如果有得揀,我一定唔會揀買會選擇領養。買嘅我都知道背後實有好多繁殖場,好唔人道,所以我唔主張買,買其實係變相支持緊呢個行為,你係想要隻狗,但你唔知佢點嚟,中間過程中相信好多狗仔係受緊傷害。

品種方面我又冇乜特別偏好,唐狗我都OK,之前養嘅係西施細狗,試下大狗又OK,我男朋友又鍾意大狗,所以就決定領養唐狗。

領養毛孩之前 / 之後相比,生活有無明顯改變?

其實有好大改變,我以前同我男朋友係兩個人,生活中心係我哋兩個人身上,鍾意出街就出街,食飯就食飯。但而家有Murphy之後,生活上大部份時間都係俾咗佢,好彩我同我男朋友都係可以Work from Home,Murphy仲細嘅時候我哋都會多啲留喺屋企,唔會留佢喺屋企好耐。當然會做一啲離家訓練時,就離開可能5分鐘,然後慢慢加到去一個鐘。

由於佢而家仲係幼犬,所以好多嘢,例如大小便去得唔准又或者肚餓佢會吠,呢啲對我哋嚟講呢開頭嗰個星期都唔係好適應到,尤其佢啱啱嚟嗰陣係係冇瞓過覺,仲要喊咗全晚,我哋就陪佢陪咗一晚。雖然係有辛苦嘅地方,但多咗一個新嘅屋企成員,都俾咗我哋好多歡樂。慢慢見到佢大啲,然後性格好似有啲唔同,對我哋嚟講好有新鮮感,同埋都覺得好有愛嘅,你會見到佢好信任你,由一開頭適應緊,到而家好痴你,佢望住你對眼都係有愛。佢係鍾意我男朋友多啲嚟嘅,所以就會好似佢好聽佢講咁樣,我覺得好神奇養咗一隻狗,成個生活模式唔同晒,但係整體都係開心嘅。

有啲咩想同「猶疑緊要唔要領養嘅人」講?

領養呢個一剎那決定係可以幫到佢好多,改變咗佢一生。無論係幼犬定係成犬,領養令到佢哋嘅生活完全唔同晒,改變咗個生命。

當然領養之前都要考慮清楚,經濟能力要support到,食糧同尿片之類,就算唔需要比一個好fancy嘅生活佢哋都好,仍然有一定嘅支出,所以要衡量自己經濟能力,屋企環境許唔許可。

同埋我揀幼犬同埋成犬都好緊要,唔係話新手唔可以養幼犬,但需要衡量一下幼犬係需要培養,喺呢個最Initial嘅stage你嘅training可以點樣教佢,呢個會好影響佢嘅成長,要衡量吓自己有冇呢個能力。如果真係冇能力都唔緊要,可以去請一個Trainer,我自己都經歷緊呢樣嘢,可能Murphy性格變得好快,或者有啲行為唔及時糾正佢嘅話會影響佢大個,例如唔解決咬手呢個習性,大個咗之後如果有唔鍾意嘅嘢就會去咬。如果真係handle唔到嘅時候,就可能需要搵專業人士去幫手。

對Suppaw嘅意見同要改善嘅地方

其實講緊睇佢哋到領養都只係好短時間內嘅事,做個checking,即係睇吓你屋企環境同樓下嘅環境,佢哋都有做呢啲background check,但我感覺到佢哋係好友善,唔係用一個好似查家宅嘅態度,你唔qualified就唔俾你領養咁。我都有聽到一啲最後領養唔成功嘅case,但義工講嘅理由我認為係好充分,好合理,所以整體我覺得領養嘅過程都係令人好滿意,同埋羲工中間同我地都有良好嘅溝通同埋跟進,所以暫時都冇乜要改善嘅地方。

Get notified when new animals are available!

* indicates required

Do you have pets at home?
I am interested in...