可唔可以介紹一下毛孩？例如年齡、品種、疾病、性格？

進寶（原名小愛）， 3歲 & 添丁， 2歲（原名小凱）係兩母子。3月果時領養咗佢哋。進寶有一個好差嘅經歷。本身佢係一隻可以俾人任摸嘅貓貓，聼義工講前主人收養進寶嘅時候發現佢有咗BB。等佢生完送走曬佢啲BB，留底添丁一隻陪佢。跟住就帶進寶去絕育。絕育後進寶就開始出現唔俾人摸的現象。但誰不知時隔幾個月後前主人又發現進寶有咗！前主人呢次就決定幫進寶打胎，再做多次絕育。從此之後進寶就變得好驚，完全唔俾人摸。前主人可能因自己都無時間特別照顧手術後嘅進寶所以佢都變得好唔開心。添丁係一隻慢熱嘅貓貓，初到屋企時都有少少怕丑，但係幾日就已經係度叫想出籠，一個禮拜後已經任人摸、任人抱，做乜都得。

點解選擇領養？心路歷程如何？

一開頭自己同屋企人一齊住嘅時候已經有養貓。隻貓B都係街執返嚟。當搬出去同男友住果時，阿哥想繼續養貓，所以就留底俾佢，自己就開始去揾領養。雖然自己都考慮過暫托，但係義工要求大部分時候要留係屋企，咁呢個就有啲難啦，所以就索性(選擇)領養。同埋暫托完都會唔捨得送出去。奈何自己嘗試過向唔同機構申請都被拒絕。直到朋友同我講電視介紹 Bring Me Home 呢個平台，建議我試下。跟住遇到CC，佢開頭建議我上網站睇下心水貓貓，點知隔日收到Whatsapp 消息有堆貓急住揾屋企。前主人因為先生過身，自己面對業主逼遷，無法獨立再收照顧收留咁多貓狗。後來知道未能被領養嘅貓貓會被送去貓舍或人道毀滅。呢件事實在太慘啦！所以我好快就直接聯絡義工，瞭解情況，跟住覺得呢個係緣分啦，睇中咗進寶 & 添丁兩母子。領養過程都好快， 2-3星期都已經成功領養佢哋! 呢位義工都好好，免卻家訪，只需定時send佢啲嘢，俾佢知道貓貓嘅動態就得㗎喇！相對比較輕鬆！義工原意係想養寵物無咁大壓力，所以覺得OK，自己都好好彩。

當初領養佢哋翻嚟嘅時候，佢哋兩個都好驚，成日匿係籠唔肯出嚟。媽媽進寶目前都仲要耐啲時間(適應)，當初帶佢翻屋企時係用個飛機籠裝住，本身屋企有個大雙層貓籠，我哋連個飛機籠都擺埋入個大籠，等佢有多啲安全感。佢除咗食嘢去厠所，長時間都訓係個籠，挨埋一邊，唔肯出嚟。行埋佢度都會 fee, 打個籠。自己都係度諗會唔會一直都係咁？之後一個月左右，媽媽已經無咁怕人，亦幫佢換個細啲嘅籠，開曬門，等佢自由出入。宜家進寶都算好好多㗎喇，雖然都係未摸得掂得，但係自己會係屋企周圍行。當我開罐頭準備喂食嘅時候，佢都會叫同用前脚掂我，但係掂完就自己彈開！宜家我哋都會成日同佢講嘢，希望佢明白我哋係無惡意嘅。亦都希望有日可以幫媽媽剪到指甲，因爲佢指甲都好長啦！

領養毛孩之前 / 之後相比，生活有無明顯改變？

生活改變唔大，因爲不嬲都養開貓。但係因爲宜家養咗兩隻貓，就會少啲出街或者出街都會快啲返屋企。就算出街食飯或返工都會心挂挂，裝埋個 cam 睇佢哋做緊乜。對自己嚟講雖然無心理準備養兩隻貓貓，但係都無乜分別，只係罐頭買多咗。

有啲咩想同「猶疑緊要唔要領養嘅人」講？

千奇唔好放棄（領養）！係你放棄嘅時候，機會就會嚟㗎喇！雖然身邊啲朋友都有話過寵物店啲寵物都好慘，無人買之後都可能被人掉出去。但係盡人事啦，幫得幾多得幾多。我堅持自己的宗旨，本身想領養或者執㗎咋！

對Suppaw嘅意見同要改善嘅地方

改善就無啦，但係Suppaw 需要讚嘅地方就好多，我覺得。其實我呢兩隻貓都唔算真係係Suppaw 平台果度（領養）。但係Suppaw 係俾咗一個途徑我知道原來有批貓要揾屋企。但係CC都勁負責，由頭到尾問住個過程點樣，到早排接貓翻嚟都會有 follow up 問下佢哋情況。我覺得呢樣嘢好好㗎，呢個真係有愛心先可以做到。唯一建議可以俾就係原來我接觸嘅義工都唔係好知道 Suppaw 呢個平台，所以希望Suppaw可以宣傳多啲。我都會係自己嘅IG 分享或者同身邊朋友講呢個平台！你哋要加油啊！