今次嘅主角係 Dexter bb @dexter_the_doggg ！你可能會好奇：「有咁多狗狗，點解要特登開個 post 介紹呢隻？」原因好簡單，因為佢係第一單經 SUPPAW 介紹而成功被領養嘅狗狗！以下係 SUPPAW 同 Dexter 爸嘅訪問對話：

可唔可以介紹一下毛孩？例如年齡、品種、疾病、性格？

Dexter 係一隻純黑油亮而大大隻隻嘅唐狗bb仔，而家仲未夠半歲，之前畀告別流浪天地嘅義工喺堆填區搵到，然後就去咗暫托家庭度。當初我哋將 Dexter 帶返屋企嘅時候，佢表現得超驚，匿咗係枱底唔敢出嚟。但係第二日開始已經會同我同我屋企人玩埋一份~

Dexter 超級聰明，好識模仿人類！我哋個仔好鐘意扮死睇吓佢有咩反應，然後 Dexter 見到又學埋一份，開頭嚇到我哋鼻哥窿都冇肉！另外佢學去廁所亦學得好快，而家已經完全唔會痾錯地方。訓練佢做其他嘢，例如唔好周圍跳、吠少啲等事情亦好簡單，因為佢超鐘意食嘢 lmao！仲有佢嘅情緒亦好明顯，雖然我哋唔算好多經驗但都超容易睇得出佢嘅心情，等我哋完全唔洗估吓估吓！

點解選擇領養？心路歷程如何？

我哋本身其實好鐘意拉布拉多，因爲以前做過導盲犬暫托家庭！但我哋覺得與其去買，領養比起購買更有意義。當時SUPPAW介紹我哋去睇吓，見到 Dexter 個樣生得有啲似拉布拉多，所以最後就選擇咗佢！

領養毛孩之前 / 之後相比，生活有無明顯改變？

照顧 Dexter 其實好似照顧緊個bb咁，又無覺好訓，又要犧牲好多私人時間（雖然都係易養過細路~ lol），真係一啲都唔簡單。不過與此同時，我哋嘅細仔亦有份一齊照顧 Dexter，而由嗰一刻開始，有時候會見到佢自我反思其實自己有冇都好似Dexter咁做錯事，亦都開始建立咗一份責任感。所以其實領養亦係教育細路一個好好嘅機會！不過當然啦，唔好因爲呢個原因就去領養，因爲動物唔係用嚟教育小朋友嘅工具，你要預咗當佢好似屋企人咁愛錫同照顧一輩子先好帶佢返屋企！

有啲咩想同「猶疑緊要唔要領養嘅人」講？

可以試下暫托先~ 領養真係一個好大嘅 commitment，即使我哋已經有暫托同養細路嘅經驗，我哋都適應咗好一段時間。當中會遇到好多困難，會經常質疑自己做得夠唔夠好，係咪真係有能力照顧好訓練好佢。

對Suppaw嘅意見同要改善嘅地方

多謝你哋嘅介紹呀！之前其實一直都有打算領養，但十五十六咗好耐，最後你哋聽完我哋心目中想搵咩類型，一睇就睇啱咗！有一個寵物社群真係好幫得手，可以解答到好多關於養毛孩嘅疑問，例如邊度買寵物用品、點樣幫佢哋沖涼、有無額外嘢需要做等等，令我哋煩少咗好多嘢！