可唔可以介紹一下毛孩？例如年齡、品種、疾病、性格等。
Xoey係一隻黑色唐狗，女仔，出世日子應該係大概 2022年6月10日 。不過都只係推斷，因爲聽義工講執翻嚟嘅時候佢得幾日大。宜家年齡大概 3.5個月。之前Xoey係由一個暫托家庭照顧。上手暫托家庭本身已向義工領養成犬 Mia，因爲好怕自己唔識凑BB狗，所以直到 Mia 2歲之後先開始幫手暫托BB狗。前期Xoey 有Mia帶住玩其實都對佢學習社交方面唔錯。自己見翻啲片同相，發現 Xoey 其實有兩個同胎兄弟。初頭聽講3隻BB都有皮膚病。Xoey 同其中一隻男仔比較快復原, 另一個就相對比較慢。之後3隻BB就各自分散去唔同暫托家庭。 8月29日 Xoey 先嚟我屋企開始新生活。
Xoey 見到人係會超興奮，開心到彈起，非常之親人，所以要控制嘅係佢嘅情緒。Xoey 唔怕生保。雖然接Xoey 入屋第一晚係食比較少嘢，會不斷觀察環境同人。但係第二晚已經食勁多嘢，好開胃。佢好直腸直肚，食完就屙。跟住開心同唔開心都好（容易）睇得出。對上一次去打針，診所啲姑娘勁鍾意佢。覺得抱住佢好似BB咁，好易搞。但係其實係屋企佢係好貪玩嘅，成日會挑戰底線，所以都幾搞笑。其實我覺得做暫托大部分人都唔會捨得佢走啩。你同佢相處咗一排，建立咗感情，都可以話係屋企人。
當初點解選擇暫託？
有次參加完Suppaw 同恩Sir 合辦的講座之後就同CC 聯絡。經CC 介紹下就認識了告別流浪天地的義工 Erica。Erica 都有問自己想要邊一隻狗狗。自己都好坦白同佢講自己原意係想托養，無養狗經驗，想知道養狗要做啲乜，預備啲乜。自己想實習下先。自己先生7年前就一直有幫手一位朋友放黑色狗狗，每日收工就搭車由黃大仙去土瓜灣放狗。呢個習慣持續咗差唔多14年，直到狗狗年老過身。加上先生自己屋企唔方便養狗，所以都好樂意幫朋友放狗，當自己係狗狗嘅主人。咁所以先生對黑唐狗係好有情意結。果時就係度諗想揀翻隻黑色狗狗。自己一直都有follow 開告別流浪天地個 Facebook。又有對幾隻黑狗印象深刻。連狗狗名都噏得出。咁跟住Erica 就俾 Xoey 同佢兄弟 Yoshi我揀，一男一女。雖然係建議我揀 Yoshi, 事關 Xoey 比較嘈。（笑）但我就係度諗女仔會唔會易教啲咧？男仔好似比較激動啲。當然暫托邊隻對我嚟講都無乜所謂嘅。不過其實義工真係好好，俾我有得揀狗托養。因爲印象中暫托都無得揀㗎嘛！最重要係義工Erica 同暫托家庭都肯山長水遠坐船帶Xoey入離島嚟我屋企，之後又要趕船走。
成件事其實都好快嘅，由聽完Suppaw 講座，同CC傾完，過咗一排都未有人聯絡我住喎，但我個心唔知點解已經想買定少少嘢先。最後買咗個（狗）欄同其他物品，預備定先。隨時（義工）call 嘅話，都有啲準備。所以當Erica 聯絡果時知道有欄，過一兩日就已經好快手送Xoey 過嚟啦！雖然初頭有話個欄有少少矮，驚狗狗會爬出嚟。但係到呢一刻狗狗都未夠高趴到出嚟嘅，所以都OK。上一手暫托家庭真係教得（Xoey）好好。Xoey 基本去厠所識係板度（屙），雖然未必準，但係都有8成係準嘅。食飯前又識得坐定定再等食物。之前的教導應該都嚴謹嘅，例如狗狗唔想再食就唔好讓狗狗有機會坐係度玩食物，就好似真係教小朋友一樣。
雖然一直都有去啲領養日，自己又鍾意唐狗（大狗啊嘛），但係因爲果陣住市區覺得環境空間太細，唔適合養（狗）。咁咁啱呢幾個月搬咗屋，開始就覺得可以養狗。因爲離島呢度空間好大，附近好多人養狗，出面又有海濱嘅路，好適合放狗。其實初初提議養狗嘅時候，先生係抗拒嘅，因爲唔想再傷心多一次，同埋養狗好大責任。當初我選擇暫托先，先生都比較同意嘅。雖然話之後會唔捨得。但係因爲領養狗狗係10幾年嘅事，係幾大嘅決定。但係暫托一個星期多啲之後，我係“一意孤行”地決定領養 Xoey。 反而先生係仲開心過我！因爲先生係自由業人士，可以日日對住 Xoey; 而我日日就要返工。
暫託毛孩之前 / 之後相比，生活有無明顯改變？
開始暫托果時，出街嘅時間真係唔夠膽太長。尤其是Xoey 嚟咗頭幾日，我係擔心到覺得自己有分離焦慮症，而唔係隻狗！（笑）例如擔心有無狗便便要清理。但係一個星期之後就發現其實出街幾個鐘，狗狗係 OK嘅。主要係Xoey都習慣咗。因爲初頭係我哋出門嘅時候佢吠得好犀利。同埋初頭係屋企食飯果陣，我都好驚 Xoey聞到啲味，甚至乎有次朋友嚟屋企打邊爐，我都好擔心 Xoey 會唔會因爲味道好吸引但係自己又無得食，好慘。跟住就有諗過不如係房間食! 雖然最後都係係客廳食，但係就用塊板遮住佢視綫。佢望唔到，就自己扮訓覺，無乜嘢。當然一排之後我哋都無再咁做 ，照常食嘢，Xoey吠完一陣之後就扮睇唔到，自己訓覺。其實都要俾佢習慣嘅。係自己當初心理未調整好，過份緊張嘅啫。
但係我其實都有不停睇 Youtube 片或者文章，瞭解下狗仔心理啊、點train 佢、教佢，至少大致上有個底先，因爲自己無經驗啊嘛。從中都知道狗吠唔一定每次都要理佢。我哋出街都會開下收音機等佢唔好覺得咁安靜，覺得好慘。
我宜家都仲有同上手暫托家庭聯絡。就算過咗成個月佢哋都好關心Xoey。托媽會好好提我要幫狗打針食藥。大家會互相交換情報。我亦會同佢講Xoey 嘅近況。
先生由於係屋企時間比較長，所以都係負責清潔比較多。訓練方面，自己一直係比較堅持想教好狗狗，反觀先生呢方面就比較隨意。但係由於Xoey 過度興奮的情緒好多時都失控，所以經過 trainer 調教之後，先生都開始覺得係有必要教好 Xoey。Xoey 初頭夜晚訓覺時候，我都會有個熄燈儀式，又播柔和音樂，佢都知道要訓覺唔會嘈。但係一到放 Xoey 出嚟果陣佢就好似傻咗咁樣，亂跑，同埋有時咬人手脚，呢啲都真係要 train 佢。
有無嘢想同考慮緊暫託/領養嘅人講？
我自己都考慮咗好耐，起碼都有1、2年嘅事。但係我覺得只要踏出果一步去實踐，你就會真係翻唔到轉頭㗎喇。你會覺得多咗一個家庭成員，會有另外一種樂趣。只有你踏出一步，你先會體驗到，先會知道其實都好開心嘅。我都曾經擔心過寵物嘅醫藥費會好貴。因爲身邊有朋友嘅狗狗因爲一啲事故都花咗7-10萬醫藥費。但係事後都無再擔心得太多，因爲就正如人都唔知幾時會病咁樣。咁所以狗狗都唔會一定會病㗎嘛，有啲係可以控制到嘅。但係如果真係病嘅話，你都要處理，當佢係一個人咁。你唔可以净係諗負面果邊，一定會有啲病啊或者好差嘅嘢（發生），咁其實你有無諗翻開心果邊都有好多嘅。咁經歷上你都唔知自己會經歷啲咩，你無得預測到㗎嘛。所以諗咁多都無用，不如實踐咗先！咁當然你都會諗係咪可以處理一啲事，可以為佢改變一啲生活習慣啊？或者係咪有 backup plan？假設你要旅行，你係咪可以安頓好佢？即係就好似小朋友一樣咋嘛。就好似生完小朋友，佢會發生咩事你都唔知㗎嘛。但係其實你會好開心㗎，有多個（寵物）係度。
我覺得如果無養過狗狗嘅可以暫托先嘅，因爲自己仲有少少翻轉頭嘅機會。其實一兩個禮拜之後你都好快已經知道自己究竟適唔適合領養。如果唔係，嚟緊果10幾年，如果你發現唔適合領養嘅話，你逼住中間棄養咁咪仲衰？暫托都仲多一個機會俾你（知道）如果你真係唔適合呢一隻狗或者你唔適合呢一個生活嘅，咁你都知道有其他人可以俾到更好嘅生活佢，都OK啊。
有咩因素令你決定由暫託變成正式領養家庭？
開始暫托果刻其實我已經抱有心理準備有機會會領養。純粹暫托期間令到我可以實習，我係咪做呢件事 -- 生活啊、我自己教狗仔嘅知識果啲，我係咪 handle 到呢樣嘢。就當一個實習期，過咗個 probation，確實可以做到呢件事啦咁樣。 由暫托變領養嘅轉捩點係同義工傾開帶Xoey出席領養日，因爲唔帶Xoey 去，佢就會少咗一個（被領養）機會。義工都有問我究竟自己嘅意願係點。如果我OK嘅話，義工就唔會再帶Xoey。如果唔係義工會繼續出（領養）post, 幫Xoey儘快揾到領養家庭。因爲狗狗越大，就越難揾主人。咁我都知要儘快做決定，但初頭我有一刻都有啲擔心Xoey 過份興奮嘅問題未解決。跟住就話可唔可以等埋 trainer嚟train 咗Xoey，等我學識啲技巧，有信心 handle 到，咁先至領養。跟住等咗一個禮拜多啲，trainer 哥哥嚟教咗我好多技巧，覺得信心大咗，隔咗兩日就覺得應該搞得掂。自己領養前都一早上過堂學少少技巧。其實自己心底裏都知道係唔會俾Xoey 走㗎喇。自費揾 trainer 都只係俾自己打多支强心針嘅啫。當初個心都係只係“養” 還是“唔養住”。自己唔會揀嚟揀去，加上都相處過一排，覺得大家嚟到呢個 timing就係個緣分，所以留低 Xoey其實都幾好。
對Suppaw嘅意見同要改善嘅地方？
Suppaw 最近舉辦過嘅講座好好，尤其是對於一個領養新手嚟講。就好似一個入門課，我瞭解多咗成個領養狀況啊，暫托呢個服務啊，同埋聽到其他狗狗主人嘅分享，讓我認識多咗。同埋如果唔係上次Suppaw 嘅 refer，我都唔會咁快聯絡義工，自己可能會等耐啲，第一步就未必咁快（都幾難）踏出，所以有個講座、轉介、暫托、領養，成個 flow 係好重要。甚至乎自己都會考慮之後做暫托家庭，等 Xoey 有個同類伴，可以大狗帶住BB狗去適應生活。
